Qeveria “Hoti” sa ishte në pushtet ua kishte mundësuar kontributpaguesve të tërhiqnin 10 për qind të kursimeve pensionale në kuadër të Ligjit për Rimëkëmbje.
Interesimi i qytetarëve për t’i tërhequr këto mjete ka qenë mjaft i madh.
Vetëm deri në javën e kaluar kanë aplikuar rreth 425 mijë kontribuues për të tërhequr 10 përqindshin.
Kështu ka thënë për Front Online, Jeton Demi, zëdhënës në Trustin e Kursimeve Pensionale.
“Deri javën e kaluar janë rreth 425 mijë kontribuues që kanë aplikuar për tërheqjen e 10 përqindëshit, për këto ditë e kësaj jave nuk i kam statistikat, por nuk pres që të ketë ndryshime shumë, për shkak se numri i aplikimeve në ditë ka renë ndjeshëm dhe janë rreth 100 zakonisht brenda një dite që aplikojnë, shuma e dhënë për këta aplikues ka shkuar në rreth 197 milionë euro”, tha Demi për Front Online.
Rreth 11 mijë persona aplikuan për të tërhequr nga Trusti më pak se 10 euro
Janë rreth 11 mijë persona që kanë aplikuar për shumë 10 euro e më pak.
E për këtë Demi thotë se gjendja ekonomike e qytetarëve nuk është në gjendje aspak të mirë.
“Fatkeqësisht numri i atyre që kanë aplikuar për tërheqje edhe të 10 eurove e më pak është i lartë. Janë 11.004 persona deri më tani që kanë aplikuar për bilance për terheqje deri në 10 euro, dmth që kanë pas kursime deri në 100 euro, dhe që tregon gjendje aspak të mirë ekonomike te një numër jo të vogël të qytetarëve, ashtu si për bilancin të tërhequra deri 50 euro, pra prej kursimeve pensionale deri ne 500 euro kanë aplikuar 60.502 kontribuues deri me tani, dhe në fakt këta që kanë aplikuar këtë shumë përbejnë 44.7 % e krejt aplikuesve të mundshëm në këtë kategori”, tha Demi për Front Online.
Shumë punëtorë u mashtruan nga punëdhënësit duke mos ua paguar Trustin atyre
Gjatë kësaj kohe, Demi tha për Front Online se ka pasur raste kur punëtorët nuk janë deklaruar nga punëdhënësi.
“Zakonisht ndodh më së shpeshti që ata nuk deklarohen nga punëdhënësi, zakonisht është kjo, dhe kemi raste që gjatë kësaj periudhe që kanë ardhur me idenë se kanë kursime të akumuluara për shumë vjet e ka ndodh që nuk kanë pasur fare kursime të paguara, përkundër që punëdhënësi i tyre iu ka deklaruar ose i ka premtuar, ai i ka ndalur edhe pagesën për pagesë të kursimeve pensionale”, tha Demi për Front Online.
Tutje Demi shton për Front Online se në javën e parë të aplikimeve më pak se 9 orë kanë aplikuar 220 mijë persona, kurse në tre muajt e fundit numri ka rënë dukshëm, shifra e të cilëve është 25 mijë persona.
Afati për aplikimin e tërheqjes së mjeteve është deri me datën 6 prill.
