Ushtruesi i detyrës së drejtorit të minierës me flotacion në Stantërg, Nexhat Dedia, ka demantuar aktivistin e Lëvizjes Vetëvendosje, Imer Fejza i cili ka thënë se sot nga puna janë suspenduar 12 minatorë të minierës së Stantërgut.

Dedia, në një prononcim për Front Online ka deklaruar se kjo nuk është aspak e vërtetë dhe se minatorët janë në vendin e tyre të punës.

“Nuk ka ndodhë asgjë, minatorët janë duke punuar, veç ka qenë një keqkuptim i tyre. Në rregull është gjithçka, janë duke punuar nuk ka asgjë në këtë. Nuk është e vërtetë”, ka thënë Dedia, për Front Online.

Ndërsa, i pyetur se Fejza ka publikuar edhe vendimin në të cilin shihen edhe emrat e punëtorëve dhe se nga e ka siguruar ai këtë vendimin, Dedia thotë se kjo po bëhet për interesa politike.

Sipas tij, sikurse shteti të ishte në rregull Fejzës duhet t’i kërkohej llogari për këtë.

“Ku e di unë për çka po i përdorin, a për interesa të veta politike. Në çfarë situate është Trepça mundet me qit kush çka don, nuk është shteti në rregull me thirr atë për çka është qit ai vendim, ka e ka marr këtë të drejtë. Ku e di unë ku e ka marrë”, është shprehur Dedia.

Pak më parë aktivisti i Vetëvendosjes, Imer Fejza përmes një psotimi në profilin e tij në Facebook, ka shkruar se 12 punëtorët janë suspenduar nga puna pasi që sipas tij ky vendim vjen si hakmarrje për shkak të grevës të cilën e kishin mbajtur pesë ditë më parë për të kërkuar pagën e tyre.

Ai, ka shkruar se Vendimi është marrë nga sot dhe bëhet fjalë për punonjësit Bajram Sadiku, Fehmi Haradini, Adnan Brahimi, Isa Tahiri, Edmond Selimi, Mensur Salihu, Burim Morina, Blerim Salihu, Isa Brahimi, Zaim Ahmeti, Rifat Lushtaku dhe Beqir Peci, të githë punëtorë të minierës së Stantergut.

https://www.facebook.com/imer.fejza.3/posts/10158471318392545

Ndërsa, më vonë ka shkruar përsëri se punëtorët janë kthyer në punë dhe se bashkë ia dolën si gjithnjë./Front Online/

https://www.facebook.com/imer.fejza.3/posts/10158471382052545