Zëdhënësi i Komisionit Qendror të Zgjedhjeve, Valmir Elezi, ka njoftuar se 1.079 kandidatë nga të gjitha subjektet politike do të garojnë për 120 ulëset në Kuvend në zgjedhjet e 14 shkurtit.

Sipas tij, për zgjedhjet e parakohshme kanë aplikuar 28 subjekte për certifikim: 21 parti politike, 2 koalicione dhe 5 iniciativa qytetare.

“KQZ-ja do të dërgojë kërkesë për verifikim dhe këtë kërkesë do ta dërgojë në 6 institucione. Planifikojmë që deri më 18 janar të përcjellim këto lista të kandidatëve për verifikim, e presim që të marrim përgjigje deri më 20 janar. E gjithë procedura presim të përfundojë deri më 31 janar”, ka thënë Elezi.