Zgjedhjet e jashtëzakonshme janë një muaj larg.

E institucioni që i organizon ato veçse ka nisur t`i kryejë disa punë.

Komisioni Qendror i Zgjedhjeve deri tash ka larguar nga listat zgjedhore mbi 133 mijë persona.

Arsyet janë dy.

“Vendimi tjetër ka të bëjë me largimin nga lista votuese e personave të cilët kanë dokument të identifikimit vetëm dokumentin e UNMIK-ut. Pra në bazë të vendimeve të KQZ-së bëhet fjalë për diku 123 mijë persona që do të largohen nga lista votuese për shkak të UNMIK-ut. Ndërkaq pjesa tjetër janë 11 mijë e 87 persona janë larguar nga skema pensionale për shkak të vdekjes”, tha për Front Online zëdhënësi i KQZ-së, Valmir Elezi.

Numri i të larguarve nga listat zgjedhore mund të rritet akoma ditëve në vijim.

Pastrimi i tyre përfundimtar, sipas zëdhënësit të KQZ-së, Valmir Elezi, varet nga lista me emrat final të votuesve që do të pranojnë nga Agjencia e Regjistrimit Civil.

“Në KQZ në kohën kur e merr listën përfundimtare të votuesve nga Agjencioni i Regjistrit Qendror Civil sepse lista votuese buron nga ekstrakti i Regjistrit qendror civil, marrim po ashtu edhe njoftimin nga ky agjencion se sa është numri i personave të vdekur që janë larguar nga kjo listë votuese nga regjistri qendror pas zgjedhjeve të vitit 2019”, u shpreh Elezi për Front Online.

Në zgjedhjet e 2019-s të drejtë vote në Kosovë patën mbi 1 milion e 972 mijë votues.

E këtë të drejtë e shfrytëzuan më pak se gjysma e tyre, diku mbi 870 mijë qytetarë.