Një ekip i kërkimit në Indonezi e ka gjetur njërën nga dy kutitë e zeza të aeroplanit që u rrëzua të shtunën me 62 persona në bord.
Ende nuk është e qartë nëse kutia e gjetur është regjistruesi i zërit në kabinën e pilotëve apo regjistruesi i të dhënave të fluturimit, shkruan CNN, transmeton Gazeta Express.
Kjo kuti u gjet nga një ekip i forcave detare të shtetit me shumë ishuj. Gjetja u bë të martën në mbrëmje sipas kohës lokale.
Zhytësit e forcave detare gjetën mbetje të aeroplanit të rrëzuar të dielën. Një ekip madje ka gjetur edhe mbetje njerëzore afër vendit ku besohet se është rrëzuar aeroplani.
Aeroplani i rrëzuar u nis të shtunën nga aeroporti i Xhakartës dhe destinacion kishte një ishull indonezian. Ai u zhduk nga radarët vetëm katër minuta pas ngritjes në qiell.
