Bashkimi Evropian është duke i përcjellë me vëmendje zhvillimet e fundit në Kosovë.

Nga BE thonë se janë në pritje të publikimit të plotë të aktgjykimit nga Gjykata Kushtetuese lidhur me shpalljen e pavlefshme të votës së deputetit Etem Arifi për formimin e Qeverisë Hoti.

Zyra për media e Bashkimit Evropian në një përgjigje për klankosova.tv ka deklaruar se BE-ja do të vazhdojë ta promovojë me të gjithë në Kosovë agjendën për integrime evropiane.

“Ne jemi duke e pritur aktgjykimin e plotë të Gjykatës Kushtetuese. Tani u takon institucioneve të Kosovës të vazhdojnë me hapat e duhur në përputhje me vendimin”.

“BE-ja do të vazhdojë të angazhohet me të gjithë në Kosovë për të promovuar agjendën e integrimit evropian dhe reformat e nevojshme”.

Bashkimi Evropian i bën thirrje gjithashtu Kuvendit të Kosovës që paraprakisht të miratojë buxhetin për vitin 2021.

“Është veçanërisht e nevojshme dhe e rëndësishme që buxheti i vitit 2021 të miratohet nga ky Kuvend sa më shpejt të jetë e mundur”.

Ndërsa, sa i përket dialogut, në BE theksojnë se janë të angazhuar në këtë proces me të dyja palët si atë të Kosovës dhe atë të Serbisë.

“Për Kosovën dhe Serbinë, rruga e tyre drejt BE-së kalon përmes dialogut’’.

‘’Ne vazhdojmë të presim që Kosova të respektojë dhe zbatojë të gjitha marrëveshjet e kaluara”, thonë për klankosova.tv, nga Zyra për media e BE-së.

Më 21 dhjetor, Gjykata Kushtetuese ka publikuar vendimin i cili e shpall të pavlefshme votën e Etem Arifit ku si rezultat i kësaj, vendi duhet të shkojë në zgjedhje.

Sipas vendimit të Kushtetueses, zgjedhjet janë të parapara të mbahen jo më vonë se 40 ditë nga dita e shpalljes nga ana e presidentes në detyrë, njofton Klan Kosova.

“Vendimi nr. 07/V-014 i Kuvendit të Republikës së Kosovës për Zgjedhjen e Qeverisë së Republikës së Kosovës, i 3 qershorit 2020, nuk është në pajtueshmëri me paragrafin 3 të nenit 95 [Zgjedhja e Qeverisë] të Kushtetutës, sepse Qeveria nuk ka marrë shumicën e votave të të gjithë deputetëve të Kuvendit të Republikës së Kosovës”, thuhet në vendimin e Gjykatës Kushtetuese.

Pas kësaj ushtruesja e detyrës së presidentes, Vjosa Osmani, ka filluar të mbajë takime për dy ditë me radhë më përfaqësues të partive politike të Kosovës.

Me ta Osmani bisedoi për caktimin e datës së zgjedhjeve.

Ndërsa, është vet kryeministri në detyrë, Avdullah Hoti, ai i cili e pranoi pa komentim vendimin e Kushtetueses për shkarkimin e tij.

Ai iu tha mediave dy ditë më parë se do ta vazhdojë punën në detyrë derisa të zgjidhet qeveria e re.