Bilall Sherifi i Nismës Socialdemokrate thotë se në zgjedhjet e kaluara u mundua nxjerrja e kësaj partie nga parlamenti siç tha “nëpërmjet kontrabandimit të votave nga Serbia”.
Prandaj sipas tij, partia e Fatmir Limajt duhet të jetë pjesë e legjislaturës së re të Kuvendit.
“Nisma gjithsesi duhet të jetë pjesë e legjislaturës së ardhshme sepse ne konsiderojmë se janë diku rreth 35 mijë votues të cilët do të ishte mëkat nëse nuk do të përfaqësoheshin në legjislaturën e ardhshme. Prioritet duhet të jetë që zëri i këtyre njerëzve të jetë në parlament’, tha Sherifi në Pressing.
Sherifi tregoi se ata ende nuk kanë vendosur se si do të garojnë në zgjedhjet e parakohshme.
“Janë tre opsione të mundshme: Një koalicion rreth Nismës me disa parti të tjera, pak a shumë si në zgjedhjet e kaluara. Një koalicion i mundshëm me partitë më të mëdha”, theksoi ai.
“Z. Limaj ka pasur kontakte të vazhdueshme me PDK’në, nuk e di nivelet e tjera në PDK a janë të njoftuara. Me z.Mustafa gjithashtu dhe vendimi përfundimtar do të merret në ditët në vijim. Këto këto tre opsione kemi në tavolinë’, tha Sherifi.
