Anëtari i Lidhjes Demokratike të Kosovës, Naser Rugova, ka thënë se zgjedhjet e parakohshme janë të pashmangshme dhe jo vetëm për çështjen e presidentit.
Ai tha se Lista Serbe dje në Beograd ka treguar se nuk e sheh veten si pjesë të koalicionit.
“Dje në Beograd u pa qartë që lista serbe nuk e sheh më veten pjesë të koalicionit. Veprimet e tyre destruktive në Kuvend janë po ashtu tregues që ata tashmë punojnë kundër qeverisë Hoti. Shto kësaj edhe pamundësinë për marrëveshje rreth Presidentit dhe bëhet e qartë që zgjedhjet e parakohshme janë të pashmangshme. Zgjedhjet e parakohshme nuk mund të mbahen para Shkurtit 2021, që do të thotë nuk ka gjasa teorike që qeveria e ardhshme të zgjedhjet para Majit 2021 dhe ta kalojë buxhetin, kjo në skenarin më të mirë”, ka shkruar Rugova në Facebook.
Ai ka thënë se nuk duhet t’i komplikohet jeta e qytetarit pa nevojë e për inate provinicale.
“Duhet lënë retorikat propagandistike dhe duhet marrë vendime serioze për vendin. Për të tjerat le të vendosë sovrani”.
“Afati i fundit për votimin e buxhetit është Marsi i vitit 2021. Nëse VV dhe PDK vërtet duan zgjedhje atëherë duhet votuar buxhetin, përndryshe do të jenë përgjegjëse për bllokadën totale financiare të vendit me 1 Prill 2021”.
