Nënkryetari i Lidhjes Demokratike të Kosovës (LDK), Lutfi Haziri u është kundërpërgjigjur ultimatumeve të PDK-së, pasi zyrtarë të kësaj të fundit kanë thënë se do t’i japin votat për rrëzimin e Qeverisë, nëse s’i jepet pozita e presidentit të vendit.

Në një bisedë për GazetaBlic, Haziri ka shtuar se LDK-ja, sipas tij, s’punon nën ultimatumeve dhe çështjet tjera i kryejnë përmes dialogut.“Besoj që dialogu i brendshëm duhet të ndërtohet mbi kulturën e mos-kushtëzimeve edhe largimet nga ultimatumet dhe nga qasja politike që në këtë rrethana e rëndojnë krizën dhe jo ta lehtësojnë. LDK-ja s’punon nën ultimatume as në kushte të askujt, ne punojmë vetëm me Kushtetutë dhe krizat me i zgjedh vetëm me dialog”, ka thënë Haziri.

Më tej Haziri ka shtuar se i qëndron prapa deklaratave të tij që posti i presidentit i takon kësaj partie, duke ia bërë të qartë të parit të AAK-së, Ramush Haradinajt se s’kanë vota për të.“Unë i qëndroj deklaratave të mia që i kam dhënë më parë, që posti i presidentit t’i takojë LDK-së. Pra, besoj që ka ardhur koha që LDK me kthye rolin e vetë në Presidencë, por jo në dëm të Qeverisë”, ka thënë ai.