Pas dëgjimit të dëshmive nga një psikiatër i cili trajtonte Skanan, akuzat për vrasje u tërhoqën të premten derisa prokurori Michael Brady QC tha se nuk kishte perspektivë reale për dënim të saj. Ndërsa, gjykatësi Justice Wall do ta japë vendimin për dënim për vrasje pa paramendim ndaj Skanas, të martën.

Gjykata dëgjoi se si 7-vjeçarja ishte dërguar nga prindërit në Parkun e Mbretëreshës në Bolton më 22 mars dhe po shëtiste me skuterin e saj. Ajo po thërriste nënën e saj ndërsa po shkonte skaj Skanas e cila ishte ulur vetëm dhe po mbante një thikë.

Skana u ngrit në këmbë, kapi vajzën dhe i preu fytin para se të largohej.

Prokuroria pretendoi se ishte në dorën e jurisë të vendoste nëse ky ishte rast vrasjeje me apo pa paramendim dhe vuri në pikëpyetje nëse shëndeti mendor i Skanas ishte “justifikim i bindshëm” për veprimet e saj.

Prokurorët i thanë jurisë se në një bisedë mes Skanas dhe një infermiereje rreth sulmit, doli se ai ishte i planifikuar, një vrasje e kalkuluar.

“Ishte e paramenduar. Unë prita në park dhe zgjodha viktimën time, bëra çfarë bëra dhe u përpoqa të arratisesha”, kishte thënë Skana.

Por, gjykatës iu tha edhe se biseda ishte bërë kur Skana nuk po merrte ilaçet për shëndetin mendor të saj si pjesë e trajtimit në spital.

Skana kishte ardhur në Britani nga Shqipëria në vitin 2014. Në vitin 2017, ajo e kishte therur nënën dhe motrën e saj dhe ishte pranuar në një spital të psikiatrisë tri herë.