Që nga fillimi i pandemisë, Kosova këtë të premte ka shënuar numrin më të lartë të infektuarve nga Covid 19.
Rritja e numrit të testimeve nga IKSHKP ka rritur edhe numrin e të infektuarve të konfirmuar.
Në 2059 mostrat e marra të IKSHPK-së, 963 persona kanë rezultuar pozitivë. Sipas këtyre të dhënave, del se rreth 47% e pacientëve të testuar kanë rezultuar pozitivë, raporton KOHA.
Rritja enorme e personave të cilët gjatë 24 orëve janë infektuar nga Covid 19 ka bërë që IKSHPK përmes një statusi, të bëjë thirrje për kujdes të shtuar dhe respektim të masave.
Ky institucion ka tërhequr vërejtjen se ekziston rreziku i një shpërthimi të mundshëm i cili mund të paraqesë rrezik për jetën e qytetarëve.
Numri i pacientëve të vdekur gjithashtu është rritur në krahasim me ditët e fundit.
Gjatë 24 orëve të fundit, 13 pacientë kanë vdekur nga Covid 19, të moshave nga 60 deri në deri në 90 vjeç, duke e çuar në 798 numrin e të vdekurve.
Ndërsa 177 pacientë janë shëruar, duke e çuar në mbi 16 mijë numrin e të shëruarve.
Prishtina përsëri ka shënuar numër të lartë të të infektuarve me 347 raste pozitive, derisa qytetet e tjera kanë relativisht numër më të vogël të të infektuarve.
Ndërsa në 708 ka shkuar numri i pacientëve të cilët po trajtohen në QKUK dhe spitalet rajonale. Nga kjo shifër 489 janë me oksigjeno terapi, 13 në respiratorë dhe 47 në CPAP.
E si shkak i ngritjes së numrit të pacientëve që kanë nevojë për trajtim spitalor, sidomos atyre që kanë nevojë për trajtim me oksigjen, SHSKUK ka hapur tender për të siguruar 8 mijë e 600 maska të oksigjenit.
Ky institucion ka bërë thirrje që për shkak të fluksit të madh të pacientëve të përshpejtohen procedurat dhe në kohë sa më të shkurtër të kryhet kontraktimi i ofertuesve.
Me numër të madh të pacientëve po përballet edhe qendra e mjekësisë familjare në lagjen “Emshir”, e dedikuar vetëm për pacientët me Covid 19.
Nga kjo e premte, Prishtina dhe 8 komuna të tjera për dy javë rresht do të kenë kufizim të lëvizjes dhe orë policore, e cila nis në orën 19:00 e zgjat deri në orën 5:00 të mëngjesit.
