Disa nga kandidatët për studentë që s’janë pranuar në Fakultetin e Mjekësisë në Universitetin e Prishtinës kanë dalë të protestojnë para këtij objekti duke kërkuar që të rritet numrin i të pranuarve.

Vleron Luzha, thotë se kanë marrë dritën e gjelbër nga shumë institucione për t’iu plotësuar këtë kërkesë, por shtoi se Dekanati është i vetmi që po qëndron i heshtur rreth këtij shqetësimi, njofton Klan Kosova.

“Qëllimi ynë është i qartë. Kërkojmë që të zgjerohet numri i të pranuarve në Fakultetin e Mjekësisë, në degën e Mjekësisë së Përgjithshme. Ka ndodhur edhe viteve të kaluara dhe të njëjtën presim që të ndodhë edhe në këtë vit. Kemi marrë dritën e gjelbër nga të gjitha institucionet relevante: Ministria e Arsimit, Ministria e Shëndetësisë, Agjencioni i Akreditimit, Rektorati, por i vetmi institucion që rri si i heshtur është Dekanati. Pra, kërkojmë që sa më shpejtë të marrin një përgjigje definitive rreth kërkesës sonë”.

Ata po paralajmërojnë se do të vazhdojnë t’i parashtrojnë kërkesat e tyre me protestë.

Ndërkaq, Jona Halimi, thotë se hapja e vonshme e konkursit për pranim i ka mohuar mundësinë edhe për të aplikuar në fakultete të tjera të rajonit apo të botës – rrjedhimisht duke i penalizuar me një vit pa studime.

“Mosmenaxhimi i mirë i hapjes së testit pranues që u shty deri në tetor na ka bërë të pamundur për të aplikuar në fakultetet e Tiranës dhe Tetovës. Po ashtu, është bërë e pamundur të marrim viza studentore nëpër ambasada për shkak të pandemisë. Universiteti i Prishtinës është i vetmi që e ka të akredituar këtë degë”.