Kryeministri i Libanit, Mustapha Adib, ka dhënë sot dorëheqje nga posti i tij, ky vendim erdhi si shkak i një ngërçi politik për formimin e Qeverisë.

Njoftimi dhe vendimi i Adib erdhi pas një muaji që kur u emërua në krye të detyrës dhe pas një takimi me presidentin libanez, Michel Aoun.

Udhëheqësi francez, Emanuel Macron, u ka bërë presion zyrtarëve libanezë që të formojnë një kabinet të përbërë nga specialistë për të punuar në miratimin e reformave urgjente, për të nxjerrë Libanin nga kriza ekonomike dhe financiare si dhe nga shpërthimi i 4 gushtit në Bejrut, përcjell France24.

Të gjitha përpjekjet e Mustapha Adib të mbështetura nga Franca, kanë hasur në pengesa të shumta, pasi grupet kryesore Shiite të vendit, Hezbollah dhe Amal, kanë këmbëngulur në mbajtjen e Ministrisë kryesore të Financave.

Këmbëngulja e të dy grupeve ishte gjithashtu për të emëruar ministrat e tyre në kabinetin e ri si dhe kundërshtuan ashpër formimin e qeverisë, pa u këshilluar me ta.

Adib deklaroi se po tërhiqet me arsye që kabineti që ai do ta formonte, “ishte i detyruar të dështonte” dhe ishte i etur për të mbrojtur unitetin kombëtar.