Mijëra imigrantë kanë ikur nga zjarret që përfshinë kampin në ishullin grek Lesbos të mërkurën, ndërsa kryeministri i Greqisë ka thirrur një mbledhje emergjente të ministrave, shkruan agjencia Reuters.

Nuk është raportuar momentalisht për viktima. Zjarri ka përfshirë kampin e stërngarkuar të imigrantëve në Moria pak pas mesnatës, është njoftuar nga zjarrfikësit.

Deri në orët e hershme të mëngjesit të së mërkurës, u dogjën gati gjithë kontejnerët dhe tendat në kampin Moria, ku shiheshin vetëm disa njerëz duke mbledhur gjërat personale nga rrënojat.

Nuk ka pasur raportime për të lënduar apo të vdekur, ndërsa nuk dihen ende shkaqet e këtij zjarri.

Moria është “shkatërruar ndoshta plotësisht”, ka thënë ministri i Migracionit, Manos Logothetis, për “Athens News Agency”.

Kryeministri i Greqisë, Kyriakos Mitsotakis, ka ftuar një mbledhje emergjente herët të mërkurën. Fillimisht thuhet se zjarri ka shpërthyer në lokacione të ndryshme në kamp, pasi autoritetet janë munduar të izolonin një numër të individëve që kishin rezultuar pozitivë me COVID-19.

“Zjarri është ende duke vazhduar, kampi është evakuuar. Gjithë këta njerëz janë në rrugën nacionale drejt Mytilinit. Ka policë që nuk po i lënë të kalojnë. Këta njerëz janë duke fjetur nëpër fusha”, ka thënë Panagiotis Deligiannis, dëshmitar i ngjarjes.

Së palu 25 zjarrfikës me dhjetë kamionë, të ndihmuar nga policia, kanë luftuar me zjarret brenda dhe jashtë kampit. Zjarrfikësit kanë treguar se janë shtyrë nga imigrantët gjatë përballjes së tyre me zjarr.

Njerëz janë parë duke u larguar nga kampi me valixhe.
“Situata ishte jashtë kontrollit”, ka thënë polici Argyris Syvris.

Kampi në Moria, ku ishin mbi 12 mijë imigrantë – më tepër se katërfishtë sa e ka kapacitetin – është kritikuar vazhdimisht për kushte të dobëta të jetesës.

Ky kamp ishte izoluar javën e kaluar pasi autoritetet konfirmuan se një azilkërkues aty ka testuar pozitiv për koronavirusin e ri. Numri i të infektuarve ëshë rritur deri në 35 që nga atëherë.