Zyra e Prokurorit të Specializuar në Hagë nuk e ka pohuar e as mohuar mundësinë që katër mijë dosje të tyre të kenë rrjedhur në publik të hënën.

Në lidhje me pretendimin e Organizatës së Veteranëve të Luftës në Kosovë për pranimin e katër mijë dosjeve të Gjykatës Speciale të hënën në mëngjes, Zyra e Prokurorit të Specializuar ka thënë të jetë në dijeni për raportimin e mediave për këtë çështje.

Në një përgjigje me shkrim për Gazetën Insajderi, Agnela Griep, zëdhënëse e Zyrës së Prokurorit të Specializuar, ka deklaruar se ZPS-ja nuk ka koment lidhur me rrjedhjen e “4 mijë dosjeve” të Speciales.

“I kemi parasysh raportimet e mediave në lidhje me këtë çështje. Nuk kemi koment për të dhënë”, është shprehur shkrtimisht Griep.

Organizata e Veteranëve të Luftës së UÇK-së, përmes një konference për media, ka bërë të ditur se në orët e hershme të mëngjesit të së hënës, kanë pranuar një pako me 4,000 dosje nga Gjykata Speciale.

Hysni Gucati, kryetari i OVK së UÇK-së, tha se pakon e kanë gjetur në ora 09:15 dhe se nuk e njohin personin që e ka sjellë.

“ Në ora 9:15 ka ardhur një paketë në organizatë qe nuk e dijmë kush e ka sjellur, në këtë paketë që ka ardhur tek në, që po i shihni këto materiale janë diku 4 mijë dosje të Gjykatës Speciale”, tha ai.

Ndërsa, nënkryetari i OVL UÇK-së, Nasim Haradinaj tregoi se këto dosje janë të dhëna të dëshmitarëve të kësaj Gjykate. Sipas tij, Gjykata Speciale ka bashkëpunëtor personat që kanë kryer krime në kohën e Millosheviqit. /Insajderi.org/