Kryetari i Partisë Socialdemokrate, Milo Gjukanoviq, ka akuzuar partitë serbe në vend se po punojnë për kthimin e Malit të Zi nën tutelën serbo-ruse, por paralajmëroi se ata do të dështojnë në këtë drejtim.
Të dielën në Mal të Zi mbahen zgjedhjet parlamentare dhe kreu i socialdemokratëve sot mbajti një tubim zgjedhor në Tivat, prej nga drejtoi edhe një herë akuza ndaj partive opozitare serbe për nacionalizëm serbo-madh.
Ai tha se megjithëse tre koalicione opozitare serbe operojnë në disa kolona, ‘aleanca e tyre përfaqëson një këmbësori politike të nacionalizmit serbo-madh në Mal të Zi, detyra e të cilëve është që ta kthejnë vendin serish në të kaluarën’.
“Së pari, ata i ofruan Malit të Zi të kthehej në rrethin e Serbisë së zgjeruar, dhe pastaj të linte rrugën evropiane dhe të kthehej nën ombrellën në interes të Rusisë. Dhe tani: të ndriçojë rrugën drejt së ardhmes për Kishën Ortodokse Serbe me dogmat e saj mesjetare?! Unë nuk besoj në atë rrugë”, tha Gjukanoviq, njoftojnë mediat e Malit të Zi.
