Ish-deputetja e LDK-së dhe tani anëtarja e Këshillit të Përgjithshëm të kësaj partie, Melihate Tërmkolli në një intervistë për Front Online ka kritikuar kabinetin qeveritarë të udhëhequr nga Avdullah Hoti duke thënë se përbërja nga radhët e partisë ku edhe vet bënë pjesë ka zgjedhur ekipin e 3 apo të 4 për pjesëmarrje në Qeveri.

“Tash është pritur që LDK-ja të startoj me një kapacitet shumë më të lartë se sa që ka hy në këtë Qeveri. Konstruktimi dhe strukturimi i kësaj Qeverie ka dhënë se nuk do të jetë kjo Qeveria e cila mund të bartë barrën e përgjegjësie të kësaj kohe. LDK-ja ka përzgjedhur diku ekipin e 3 apo të 4 të strukturës qeveritare dhe nuk mund të priten rezultate më shumë se sa këto që janë”, ka thënë ajo për Front Online.

Anëtarja e Këshillit të Përgjithshëm të LDK-së: Qasja e Hotit për dialogun e dëmshme, nuk mund të sjellë njohje

Tërmkolli është shprehur se qasja e Hotit në raport me dialogun me Serbinë është e gabuar dhe nuk sjellë marrëveshje finale që do të kulmonte me njohje nga Serbia, ashtu siç është pritur nga kjo Qeveri.
“Qasja e Qeverisë në bisedime është jashtëzakonisht e dëmshme dhe madje mund të dal me pasoja të parikuperueshme, sepse në këtë finalizim të proceseve çdo gabim mund të na kushtoj shumë. Qasja në këto bisedime është krejtësisht e gabuar. Ne si institucione dhe si qytetarë jemi përgatitur të bisedojmë për një marrëveshje që do të rezultonte me njohjen e Kosovës nga Serbia, kështu siç po zhvillohen këto zhvillime janë larg atij koncepti”, është shprehur ajo për Front Online.

Tërmkolli: Duhet Qeveri gjithëpërfshirëse me PDK-në dhe VV-në

Tërmkolli po e cilëson Qeverinë të udhëhequr nga LDK-ja me AAK-në, Nismën dhe Listën Serbe si jo të qëndrueshme, dhe për këtë kërkon një qeveri gjithëpërfshirëse me PDK-në dhe VV-në në Qeveri.
“Nëse jemi në një situatë në të cilën duhet bashkëpunimi me secilin unë mendoj që duhet një qeveri gjithëpërfshirëse në të cilën do të jetë edhe PDK-ja edhe Vetëvendosja edhe kjo qeveri që është tani, ndoshta do të ishte një rast në të cilin që të gjithë do të e koncentronin dhe do ta orientonin aktivitetin dhe angazhimin në realizimin e këtyre detyrave që i kemi, mandej kemi kohë për përplasje e edhe individuale edhe partiake ndërpartiake”, tha ai për Front Online.

Tërmkolli godet Vjosa Osmanin: Me veprimet e saj po vepron si zëdhënëse e VV-së

Tërmkolli ka komentuar edhe shkarkimin nga pozita e nënkryetares së LDK-së, Vjosa Osmani duke thënë se Osmani dëmtoi partinë me qëndrime si të ishte zëdhënëse e Vetëvendosjes.

“Aq sa e dëmtoi Vjosa LDK-në dhe po e dëmton edhe më tutje me sjelljet dhe veprimet e saj politike si zëdhënëse e Vetëvendosjes dhe në shërbim të VV-së, po të ishte në shërbim të shtetit në rregull edhe mos ta dëgjonte LDK-në, por me u bë në shërbim të një ideologjie dhe një partie tjetër mendoj që nuk është shumë e mirë, ky pozicion që ka marrë Vjosa”, ka thënë Tërmkolli për Front Online.

Melihate Tërmkolli: LDK-ja është mbyllur brenda interesave e grupacioneve të caktuara

Por ajo thotë se nëse do të mbahej mbledhja e Këshillit të Përgjithshëm do të duhej të diskutohej edhe për personat që e ngritën atë si pasojë e politikave të gabuara të VV-së.

“Në atë takim do të duhet të diskutohej edhe për qasjen e këtyre që e bënë Vjosën edhe për Vjosën, sepse në fakt Vjosa është një produkt i disa politikave të gabuara që janë bërë brenda politikave të LDK-së. Ka kohë që LDK-ja është mbyllur brenda interesave shumë të ngushta të grupacioneve të caktuara që po e dëmtojnë dhe po e çojnë pashmangshëm në humbje pas humbje”, ka thënë Tërmkolli për Front Online.

Situata me pandeminë nuk po merret seriozisht nga Qeveria

Kosova po përballet me pandeminë Covid-19 tash e 5 muaj, e sipas Tërmkollit tani Qeveria aktuale nuk është duke e marrë seriozisht situatën, dhe thotë se nuk po menaxhohet mirë.

“Ne jemi në situatën më shumë se serioze me pandeminë dhe më duket se Qeveria nuk është shumë e vetëdijshme për krejt seriozitetin e kësaj situate. Menaxhimi deri tani nuk mund të thuhet që ka qenë më i miri, madje nuk mund të thuhet as që ka qenë i mirë, nuk është menaxhuar shumë seriozisht krejt kjo situatë”, tha ajo për Front Online.