Osmani: Mbrojtja e mjedisit është e drejtë kushtetutese e qytetarëve të Kosovës

Lajme

Osmani: Mbrojtja e mjedisit është e drejtë kushtetutese e qytetarëve të Kosovës

FrontOnline

04 Gusht 2020

Kryetarja e Kuvendit, Vjosa Osmani mbajti sot takim online me përfaqësuesen e organizatës joqeveritare OJQ ‘Pishtarët’, Shpresa Loshaj. Fokus i diskutimit në mes të palëve ishte çështja e degradimit të mjedisit në Kosovë si rezultat i ndërtimit të hidrocentraleve me kapacitet të vogël gjenerues, ku në veçanti u trajtua rasti i tri hidrocentraleve të ndërtuara në Komunën e Deçanit.

Osmani e përgëzoi Loshaj dhe aktivistët ambientalistë për punën që po bëjnë për ngritjen e vetëdijës qytetare për rëndësinë e mbrojtjes së mjedisit.

“Degradimi i mjedisit në emër të promovimit të investimeve në burime të ripërtëritshme të energjisë është i papranueshëm. Ekzistojnë mënyra të duhura se si këto investime mund të realizohen me sukses, e kjo bëhet gjithmonë në konsultim të ngushtë me qytetarët e Kosovës”, theksoi kryetarja Osmani.

Ajo po ashtu tha që në këtë drejtim, përveç kompanive investuese, përgjegjësia bie tek institucionet vendore, dhe të dyja palët duhet të sigurohen që investimet të bëhen konform ligjeve, e jo konform interesave të një grupi të vogël të interesit.

Në takim, Loshaj e ngriti edhe çështjen e padive dhe kërcënimeve që po i bëhen asaj dhe aktivistëve nga kompania investuese në Komunën e Deçanit.

Lidhur me këtë, znj. Osmani u shpreh se liria e shprehjes nuk guxon të kërcënohet nga askush dhe se ngritja e një padie strategjike kundër pjesëmarrjes së publikut (SLAPP) ndaj njërit prej aktivistëve, me qëllimin të heshtë dhe frikësojë kritikët, duke i ngarkuar ata me kosto të lartë të mbrojtjes ligjore në mënyrë që të braktisin kundërshtimin e tyre, është pikërisht një kanosje e drejtpërdrejt ndaj lirisë së shprehjes.

“Do të angazhohem personalisht të ngris vetëdijen rreth rëndësisë së mbrojtjes së mjedisit dhe lirisë së shprehjes. Gjersa, përmes një komisioni hetimor parlamentar, do të angazhohemi që të trajtojmë përmbajtësisht dhe të sqarojmë përfundimisht aspektin ligjor të këtyre hidrocentraleve. Shpresojmë që edhe Qeveria do të ndjekë të njëjtin shembull”, theksoi Osmani.

Në fund, palët ritheksuan se investitorët duhet të marrin seriozisht bashkëpunimin me qytetarët, duke u siguruar që investimet e tyre të mos dëmtojnë komunitete të caktuara, përderisa investimet të bëhën çdo herë në përputhje më legjislacionin vendor dhe praktikat më të mira investuese, në mënyrë që investitorët aktualë të jenë shembull i mirë për tu ndjekur dhe nga investitorët e tjerë në të ardhmen.