Ish-komandanti i Ushtrisë Çlirimtare të Kosovës (UÇK), nga Zona e Nerodimes, Shukri Buja, ka reaguar pas ngritjes së aktakuzës nga Gjykata Speciale, për presidentin Hashim Thaçi, si dhe për kryetarin e PDK-së, Kadri Veseli.
Ai për “Front Online”, ka thënë se ngritja e këtyre aktakuzave ishte e pritshme.
“Po ka qenë e pritshme ngritja e aktakuzave. Unë e kam cilësuar këtë Gjykatë edhe politike, të njëanshme dhe të dëmshme për Kosovën. Priten këto procese të dëmshme për Kosovën dhe për bashkëluftëtarët e mi”, ka thënë ai.
Në ndërkohë Buja, ka theksuar se beson në pafajësinë e bashkëluftëtarëve të tij.
“Po sigurisht. Ne kemi qenë bashkëluftëtarë dhe besoj që janë të pafajshëm. Ne kemi bërë luftë çlirimtare dhe nuk kemi bërë luftë pushtuese”, ka thënë tutje ai.
Në ndërkohë sot gjatë ditës, prokurori i Dhomave të Specializuara në Hagë, ka ngritur aktakuzë ndaj presidenti Hashim Thaçi, si dhe ndaj liderit të PDK-së, Kadri Veseli.
Të njëjtit sipas aktakuzës, akuzohen për 100 vrasje, gjatë luftës së fundit në vend.
Përndryshe edhe Buja, ishte ndër të parët që është ftuar për intervistim nga Gjykata Speciale./Front Online
