Kryeministri izraelit Benjamin Netanjahu ka shprehur dyshim në aftësinë e këshilltarit të lartë të presidentit amerikan Donald Tramp, Xhared Kushner, që të udhëheqë me planin paqësor të Lindjes së Afërt, shkroi në librin e tij ish këshilltari i Trampit, Xhon Bolton.

Sipas disa fragmenteve të librit të publikuara në “Uoll Strit Xhurnal” dhe në Si-En-En, Boltoni kishte biseduar me Natanjahun para se të hyjë në administratën e Trampit.

Boltoni shkroi se Netanjahu “dyshonte për atë që detyra për t’i dhënë fund konfliktit izraelit-palestinez t’i ndahet dhëndrit të Trampit, Kushner, familjen e të cilit Netanjahu e njihte shumë vite”.

Ai kishte shtuar se kryeministri i Izraelit “nuk ishte publikisht kundër idesë, por si edhe pjesa më e madhe e botës, kishte pyetur se pse Kushneri kishte menduar se do të ketë sukses aty, ku nuk kishin pasur sukses as disa si Kisinxheri”.

Si përgjigje për vërejtjet e Boltonit, kabineti i Netanjahut kumtoi se “ka besim të plotë në aftësinë dhe vendosmërinë e Xhared Kushner dhe hodhi poshtë çfarëdo lloj përshkrimi të kundërt”.

“Ekipi për Lindjen e Afërt i administratës së SHBA-së i kryesuar nga Kushner me sukses i formulon parimet e presidentit Tramp në Vizionin për paqe me ofrimin e planit sa më real për paqe në rajonin tonë. Kushneri gjithashtu kontribuoi në vendimet historike të presidentit Tramp që ta njohë Jerusalemin, ta lëviz Ambasadën amerikane në kryeqytetin e Izraelit dhe ta njohë sovranitetin izraelit mbi Rrafshnaltën e Golanit”, thuhet në kumtesën e kabinetit të Netanjahut.

Boltoni, i cili ishte pushuar në shtator të vitit të kaluar, planifikon që ta publikojë librin e tij më 23 qershor.

Shtëpia e Bardhë e ka paditur me qëllim që ta pengojë publikimin.

Në padinë thuhet se libri përmban informacione sekrete dhe se publikimi mund t’i shkaktojë dëm sigurisë nacionale.