Në ditën kombëtare të Rusisë, presidenti Vladimir Putin iu bëri thirrje qytetarëve rusë që të kujtojnë vlerat themelore të tyre, një përpjekje kjo për të siguruar mbështetjen popullore për votimin e ndryshimeve kushtetuese që mund ta mbajnë atë në pushtet deri në vitin 2036.
Votimi plebishitar do të mbahet nga data 25 qershor deri më 1 korrik dhe nëse aprovohen, ndryshimet përfshijnë një klauzolë që i lejon presidentit 67-vjeçar, në pushtet që prej 99-s, të shërbejë edhe për dy mandate 6-vjeçare pas vitit 2024, kur në bazë të ligjeve aktuale është i detyruar të tërhiqet.
“Ne kemi një kod të përbashkët historik, kemi vlera morale, kemi respekt për paraardhësit tanë dhe dashuri për tokën tonë.
Sikurse ju e dini, ka pasur kërkesa të vazhdueshme për të përfshirë këto vlera themelore në kushtetutën ruse, ndaj unë jam i bindur se shumica e qytetarëve tanë i mbështesin këto ndryshime”, tha presidenti i Rusisë.
Me masat anti-COVID që kanë kufizuar daljet e tij, kjo është shfaqja e dytë publike e Putin në pak më shumë se një muaj, pas asaj të 9 majit, kur mori pjesë në paradën ushtarake modeste me rastin e Ditës së Fitores.
Ndryshimet kushtetuese përfshijnë një gamë të gjerë çështjesh mes të cilave përcaktimi i martesës si një lidhje mes burrit dhe gruas dhe mbajtja e rublës si e vetmja valutë ligjore e Rusisë.
Por në muaj të tërë publiciteti televiziv, online dhe përmes manifesteve të përhapura në mbarë vendin, Kremlini ka dështuar të përmendë faktin se ndryshimet do t’i lejojnë Putin të rizgjidhet.
