Që nga viti 2012, të paktën 58 vetë kanë humbur ndjenjat pasi janë kapur për fyti nga efektiv policie në Minneapolis, ka zbuluar CNN nga një analizë e të dhënave të Policisë së qytetit.

Nga 428 persona tek të cilët është përdorur një teknikë e ngjashme me atë që u përdor ndaj George Floyd, i cili më pas humbi jetën, 14% kanë humbur ndjenjat.

Kjo do të thotë që procedura, e cila është e ndaluar në pjesën më të madhe të rajoneve të policisë, është përdorur rreth një herë në javë në këtë periudhë.

Një tjetër e dhënë tregon se rreth 2/3-at e personave të kapur me forcë ishin me ngjyrë, në një qytet ku kjo bashkësi përbën rreth 19% të popullsisë.

Ekspertë të sigurisë i thanë CNN se veprimi i efektivit Derek Chauvin, i cili vendosi gjurin mbi qafën e Floyd duke ushtruar presion mbi të për disa minuta, nuk do të klasifikohej si një procedurë e rregullt ndalimi në manualet e policisë.

Por, në manualin e Policisë së Mineapolisit thuhet se efektivit i lejohet të vendosë dorën ose këmbën mbi qafën e të ndaluarit, pa ushtruar presion mbi rrugët e frymëmarrjes.

Pas arrestimit, efektivi Chauvin, është akuzuar për vrasje të shkallës së tretë dhe të dytë. Ai do të dalë para gjykatës gjatë këtij muaji.