Presidenti Hashim Thaçi të mërkurën do ta ketë një përballje goxha me rëndësi.

Ai do të diskutojë virtualisht  me disa figura politike që i ka kritikuar goxha fort muajve të fundit.

Janë krerët e Bashkimit Evropian, ata të cilët i kanë dërguar atij ftesë para kryeministrit Kurti për të marrë pjesë në Samitin e Zagrebit.

E në këtë samit online, të parit të shtetit kosovar, do t`i bëhet me dije se ka vetëm një dialog dhe se ai do të udhëhiqet nga Miroslav Lajçak.

Kështu po thotë njohësi i integrimeve evropiane, Demush Shasha, për portalin Front Online.

“Dy mesazhe për Kosovën. Ai që i përket normalizimit të marrëdhënieve me Serbinë dhe ne këtë drejtim BE do e bëjë të qartë se ekziston vetëm një dialog dhe ai është dialog i fasilituar nga BE-ja dhe i drejtuar nga Lajçak”, tha ai.

Shasha: Pjesëmarrja e Spanjës në Samit, mesazh për ndryshim  të qëndrimit për pavarësinë e Kosovës

Sipas tij, është mesazh shumë i rëndësishëm diplomatik, pjesëmarrja e Spanjës në këtë Samit.

Kjo, sipas tij, tregon përafrimin e qëndrimeve të Spanjës dhe vendeve anëtare të BE-së sa i përket Pavarësisë së Kosovës.

“Mesazh i dytë është pjesëmarrja e Spanjës në Samitin e nesërm. Ky është mesazh shumë i rëndësishëm diplomatik sepse duhet të kujtojmë që Spanja vitin e kaluar e kishte refuzuar Samitin, shkaku i Kosovës. Ky është mesazhi i rëndësishëm diplomatik i përafrimit të qëndrimeve të Spanjës dhe vendeve anëtare të BE-së sa i përket Pavarësisë së Kosovës”, u shpreh ai për Front Online.

Shasha: Kosova do të ketë sukses në dialog vetëm me pjesëmarrjen e dy entiteteve

Presidenti Thaçi disa herë gjatë paraqitjeve të tij publike e ka bërë të ditur se nuk do të ulet në tavolinën e bisedimeve në Bruksel pa u liberalizuar vizat.

E kjo çështje, sipas Shashës, nuk do të hidhet për diskutim as në samitin online të Zagrebit.

Pavarësisht kësaj, ai u ka bërë thirrje krerëve të Kosovës, të mos ndjekin qasje përjashtuese ndaj BE-së.

“Jo liberalizimi i vizave nuk është pjesë e agjendës. Institucionet duhet të jenë të kujdesshme për mesazhet që përçojnë. Edhe sot duhet të evitohen thirrjet përjashtuese, qoftë ndaj BE-së dhe SHBA-së. Kosova do të ketë sukses në dialog vetëm me pjesëmarrjen e dy entiteteve. Pres që koordinimi me intensiv mes SHBA-ve dhe BE-së do të sigurojë një koordinim dhe kohezion në Prishtinë. Do të shohim një përafrim të qëndrimeve mes SHBA – BE, me `rast edhe në Prishtinë do të sigurojmë edhe një unitet më të madh”, theksoi ai në një linjë direkte për Front Online.

Mbajtjen e këtij Samiti e ka përshëndetur Presidenti Hashim Thaçi.

Ai tha se është i lumtur që ky samit nuk u anulua dhe se të tillin e sheh si një mundësi të mirë që BE-ja të rikonfirmojë perspektiven e saj ndaj Kosovës.  /FrontOnline/