Gazetari Alastair Campbell, i cili dikur shërbeu si zëdhënës i ish-kryeministrit Tony Blair ka analizuar strategjinë e re të komunikimit të Boris Johnson.
Duke mos i kursyer kritikat e ashpra në drejtim të kryeministrit britanik, ai thekson se e gjthë kjo fushatë e re komunikimi e ndjekur nga Johnson, nuk është gjë tjetër veçse një mënyrë për të larguar vëmendjen nga dështimi në menaxhimin e situatës së Covid-19.
Pak kohë më parë, Boris Johnson refuzonte t’i përgjigjej çdo pyetje që kishte lidhje me jetën familjare duke deklaruar: “Unë kurrë nuk flas për këto çështje personale”.
Por, sipas gazetarit Campbell, sot ai me siguri flet për to. Më tej shton se: “degët e propagandës pro-Johnson kanë bërë që sot lexuesit të gërmojnë faqe në faqe, nga telefoni në telefon, të përqëndruar te kryeministri, shëndeti i tij dhe djali i porsalindur”.
Në faqet e para të gazetave, me tituj të mëdhenj shkruhej se: “mendimi që kurrë nuk do mund ta shihte më të birin, i dha forcë kryeministrit për të luftuar korovirusin”.
Sipas ish-zëdhënësit të Blair, e gjithë kjo strategji komunikimi bëhet për të larguar vëmendjen nga kriza në vend. “Kulti i personalitetit ‘Bojo’ është një taktikë mjaft cinike, që synon të shkëpusë vëmendjen nga dështimet e tij të shumta në trajtimin e kësaj pandemie”, thekson ndër të tjera Campbell.
