Partia Socialdemokrate ka reaguar pas vendimit të Gjykatës Kushtetuese për të shpallur antikushtetues vendimin e Ministrisë së Shëndetësisë për të shpallur zonë karantine Komunën e Prizrenit.
PSD-ja thekson se Kosovës i duhet njerëz që e shohin ligjin para shefit, sepse sipas tyre, ministri i Shëndetësisë, Arben Vitia është “instrumentalizuar nga lufta paranojake e Kurtit me Hashim Thaçin”.
“Sot u kuptua ajo që shumëkush e kishte ditur në momentin e skadimit të masave të para antikushtetuese. Të njëjtën ditë u shpallën masat e reja. Antikushtetuese me qëllim. Gjykata Kushtetuese sot njoftoi se shpallja e Prizrenit zonë karantine shkel nenin 55 të Kushtetutës (Kufizimi i të Drejtave dhe Lirive Themelore), dhe nenin 35 (Liria e Lëvizjes). Duhet përsëritur sërish se shkelja e Të Drejtave dhe Lirive Themelore është shkelja më e rëndë e Kushtetutës. Kësaj here, shkelja e bartë firmën e Ministrit të Shëndetësisë, Arben Vitia, por të gjithe e dimë se ky i fundit është instrumentalizuar nga lufta paranojake e Kurtit me Hashim Thaçin. Kosovës i duhen njerëz me integritet që e shikojnë ligjin para shefit. Buzëqeshja pastaj mirësevjen”, thuhet në këtë reagim.
Në këtë reagim PSD-ja shprehet se me këtë vendim Gjykata Kushtetuese tërheq vërejtjen se Kuvendi ka qenë i detyruar nga Aktgjykimi i parë të nisë plotësim/ndryshimin e ligjit ekzistues, meqë rast i bën përgjegjës të gjithë për këtë.
“Me këtë rast Kuvendi ka dështuar në kryerjen e detyrave të tij Kushtetuese. Secili deputet është përgjegjës për këtë, duke filluar nga Vjosa Osmani. Pikat 15,16,17 e 18 të arsyetimit flasin vetëm për një gjë: përpjekja kërcënuese që Kryeministri Kurti ka bërë ndaj Gjykatës Kushtetuese duke ndërhyrë në punët e saj. Për të gjithë ata që këto shkelje i arsyetojnë me qëllimin e mirë të luftimit të pandemisë, Gjykata i ka rikujtuar Qeverisë Dokumentin Informativ të Këshillit të Evropës SG/Inf(2020)11 të datës 7 prill 2020. Ky dokument tërheq vërejtjen për ruajtjen e demokracisë, shtetit të së drejtës dhe Të drejtave dhe Lirive Themelore të Njeriut. I rëndë dhe i papranueshëm është fakti që Kosova është bërë pjesë e listës së vendeve që ka cënuar Të Drejtat e Njeriut, dy herë me radhë, qëllimisht”, thuhet në këtë reagim.
