I nominuari i LDK-së për kryeministër të Qeverisë së ardhshme Avdullah Hoti ka zhvilluar takim konsultues me liderin e Nisma-së, Fatmir Limajn si dhe me përfaqësues të Listës Serbe, raporton Front Online.

Hoti tha se LDK-ja është në fazën finale të përmbylljes së marrëveshjeve me partitë që do të jenë pjesë e koalicionit qeveritar.

“Jemi në fazat finale të përmbylljes së marrëveshjes me të gjitha partitë e këtij koalicion. Së shpejti do të lidhim marrëveshje. E them me kënaqësi se bisedat janë përmbyllur në masë të madhe”, tha Hoti.

Megjithatë ai tha se partia e tij, LDK është e vetëdijshme që këtë qeveri do ta formojnë në një kohë të vështirë siç është pandemia e Covid-19.

Pjesë e këtij koalicioni Hoti theksoi se do të jetë edhe partia e Behgjet Pacollit, AKR-ja.

“Ne të do të dakordohemi mbi bazën e parimeve. Sapo të jemi gati do të nisim dërgesën tonë për mandatarin. Edhe AKR do të jetë pjesë e këtij koalicioni”, pohoi Hoti.

Ndërkaq pjesëmarrjen e Listës Serbe në këtë përbërje të koalicionit ai e ka arsyetuar me të drejtën që ua jep Kushtetuta e Kosovës minoriteteve.

“Pjesëmarrja e Listës Serbe do të jetë në përputhje me normat kushtetuese si pjesë e komunitetit. Është çështje ditësh që t’i finalizojmë të gjitha marrëveshjet tona”, tha në fund Hoti. /FrontOnline/

https://www.facebook.com/FrontOnlineMedia/videos/262412864953219/