Në seancën e së hënës në Gjykatën Themelore në Prishtinë, prokurorja Ilirjana Çollaku-Tafa, ekspertizën financiare të përpiluar nga eksperti Shaip Bytyqi, e konsideroi si të pabazuar dhe në kundërshtim me dispozitat ligjore në fuqi.

Në këtë rast, ish-ministrja e Integrimeve Evropiane, Dhurata Hoxha dhe tre të tjerët Ekrem Tahiri, Fitim Mustafa dhe Gëzim Dushi, po akuzohen për keqpërdorim të detyrës zyrtare, raporton “Betimi për Drejtësi“.

“Ekspetriza financiare e paraqitur nga avokati Driton Muharremi (mbrojtësi i të akuzuarit Ekrem Tahiri), si provë, e paargumentuar ligjërisht dhe konstatimet e dhëna nuk mund të akcpetohen as nga një logjikë e shëndoshë. Është në kundërshtim, edhe me parimet e dispozitave relevante të KPP-së”, tha prokurorja Çollaku-Tafa.

Eksperti financiar Bytyqi e vazhdoi dëshminë e filluar nga seanca e kaluar, më 4 qershor 2024. Ai tha se për përpilimin e ekspertizës është bazuar në të gjitha dokumentacionet që i ka pasur në dispozicion.

“Të gjitha të dhënat, të cilat i kam paraqitur në ekspertizë janë të bazuara në fakte sipas dokumnetacionve të cilat i kam pasur në dispozicion“, tha eksperti financiar Bytyqi.

Ndryshe, sot ishte e paraparë që të jepet mbrojtja nga ana e të akuzuarve Hoxha, Tahiri, Mustafa dhe Dushi, por pas konsultimeve me mbrojtësit e tyre, të njëjtit propozuan që të vazhdohet me mbrojtjen në seancën e radhës.

Fillimisht, mbrojtësi i të akuzuarit Mustafa, avokati Arbër Jashari, propozoi që seanca të shtyhet për një datë tjetër pasi që nuk ishin të përgatitur për këtë fazë.

Propozimin e tij e përkrahën dhe avokatët Florent Latifaj, mbrojtës i të akuzuarës Hoxha, Redon Byqmeti, mbrojtësi i të akuzuarit Dushi dhe Agnez Furra, mbrojtësi i të akuzuarit Tahiri.

Të akuzuarit Dushi dhe Tahiri kërkuan që në fazën e mbrojtjes të jenë prezent avokatët e tyre (Kosovare Kelmendi (për Dushin) dhe Driton Muharremi (për Tahirin), pasi në seancën e sotme ishin me zëvendësim avokatët Byqmeti dhe Furra.

Këtë propozim nuk e kundërshtoi prokurori Fatos Ajvazi (i cili e zëvendësoi prokuroren e rastit për një pjesë të seancës), ndërsa e aprovoi kryetari i trupit gjykues, gjykatësi Vesel Ismaili.

Paraprakisht, prokurorija e rastit Çollaku-Tafa, bëri të ditur se për pjesën tjetër të seancës do e zëvendësojë prokurori Fatos Ajvazi.

Ndryshe, ish-ministrja Dhurata Hoxha akuzohet se kishte përdorë kontratën e MIE-së për të promovuar fushatën në zgjedhjet parlamentare të vitit 2019, përderisa kjo kontratë shërbente për të informuar qytetarët rreth procesit të liberalizimit të vizave.

Prokuroria Speciale e Republikës së Kosovës më 12 maj 2022, kishte ngritur aktakuzën ndaj Hoxhës dhe tre të tjerëve Ekrem Tahiri, Fitim Mustafa dhe Gëzim Dushi, duke i ngarkuar me veprën penale “Keqpërdorimit të pozitës apo autoritetit zyrtar”.