”Devolli Corporation” ia ka dalë edhe këtë vit që të jetë korporata e vetme në Kosovë, e cila ka marrë çmimet në të tria kategoritë e përcaktuara nga Oda Ekonomike e Kosovës për vitin 2023.
“Devolli Corporation” ka rrëmbyer çmimin Punëdhënësi i Vitit, çmimin eksportuesi i Vitit, si dhe çmimin Tatimpaguesi i Vitit.
Këto çmime u ndanë të enjten mbrëma në Klan Arena, në gala mbrëmjen e mbushur me përfaqësues të bizneseve, me mëse 400 afaristë të suksesshëm nga Kosova, rajoni dhe bota, si dhe me praninë e korit diplomatik të akredituar në Republikën e Kosovës.
Në këtë ngjarje i pari i Odës Ekonomike të Kosovës, Lulzim Rafuna foli për rëndësinë e bizneseve në Kosovë të cilët ndihmojnë faktikisht zhvillimin e po ashtu edhe promovimin e shtetit në rajon.
Ai ka falënderuar të gjitha bizneset për ndihmën që e kanë dhënë në vitin 2023 për taksat që ata i paguajnë shtetit, duke theksuar se bizneset janë ato që e mbajnë Kosovën.
Kjo nuk është hera e parë që “Devolli Corporation” shpallet fitues në të tria kategoritë e të bërit biznes të suksesshëm nga Oda Ekonomike e Kosovës.
Kjo korporatë, me bazë në Kosovë, por me shtrirje edhe në shumë shtete të Evropës dhe në Shtetet e Bashkuara të Amerikës, edhe në vitin që po e lëmë pas ka arritur që të afarojë suksesshëm, derisa ka bërë edhe plane për zhvillim në vitet që vijnë.
