Po ashtu, kryeparlamentari potencoi se Kosova ka shënuar një hap tjetër të sukseshëm në rrugëtimin e saj evropian, me rastin kur Asambleja Parlamentare e Këshillit të Evropës i ka thënë po anëtarësimit të shtetit tonë, duke përmbyllur kështu me sukses fazën e parë të anëtarësimit në këtë organizatë.

‘’Ndonëse kanë mbetur edhe pak ditë deri në mbledhjen e Këshillit Ministror, ne besojmë që Kosova meriton dhe duhet të anëtarësohet pa kushtëzime shtesë, të jetë anëtarja më e re me të drejta të plota në Këshillin e Evropës’’, tha ndër të tjera kryetari Konjufca, transmeton Telegrafi.

I pari i Kuvendit potencoi se për Kosovën dhe gjithë rajonin anëtarësimi në Bashkimin Evropian është i rëndësisë së veçantë, duke shtuar se përfitimet nga anëtarësimi janë të dyanëshme.

‘’Më shumë paqe, siguri dhe prosperitet zhvillimor për Kosovën dhe rajonin do të thotë një Evropë më e fortë dhe më e sigurt’’, tha më tej kryetari Konjufca.

Duke përmendur progresin që Kosova ka bërë në procesin integrues, kryetari Konjufca tha se Kuvendi i Kosovës ka luajtur rol kyç në miratimin e legjislacionit të hartuar në përputhje me acquis të BE-së, për të përafruar procesin e integrimit të Kosovës në BE.

Konjufca, po ashtu tha se është bërë më shumë se një vit prej kur është nënshkruar kërkesa në emër të Republikës së Kosovës për aplikim për anëtarësimin në Bashkimin Evropian, duke përmendur se Kosovës nga institucionet e BE-së, nga miqtë dhe aleatët e tjerë, i duhet përkrahje për ndërmarrjen e hapave konkretë e sa më të shpejt në këtë proces.

‘’Qytetarët e Kosovës, pavarësisht pritjes së gjatë, vazhdojnë të besojnë në politikat integruese evropiane dhe të kontribuojnë çdo ditë në zhvillimin e shoqërisë dhe institucioneve tona demokratike. Këtë e dëshmon edhe çmimi që do të ndahet në këtë ceremoni’’, potencoi ai.

Duke uruar të gjithë për 9 Majin, Ditën e Evropës, kryeparlamentari Konjufca po ashtu uroi për një Evropë sa më të bashkuar, me Kosovën pjesë integrale të saj.