Kosova ka shënuar rënie në renditjen e testit PISA, që mat aftësitë e nxënësve në lexim, shkencë e matematikë.
Rezultatet u vlerësuan të pritshme, por shqetësuese.
Ministrja e Arsimit, Arbërie Nagavci, ia la fajin pandemisë dhe ndërrimit të shpeshtë të qeverisë.
Mësimdhënësja e matematikës, Zoja Konjufca thotë se infrastruktura mësimore mund të ketë një rol në rezultatet e dobëta të nxënësve, por sipas saj problemi qëndron te motivi i nxënësve dhe mësimdhënësve.
“Pjesa më e mirë e arsimit është nga klasa e parë deri në të pestën. Aty mësueset kanë një konkurrencë mes vete. Nxënësit kur vijnë në shkollë të mesme, shumica kanë mbetur aty me njohuri. Pra shumicën e nxënësve të shkollës së mesme i kemi të nivelit të klasës së katërt fillore. Ne nuk mund t’ua përsërisim klasën 90% të nxënësve”, deklaroi ajo në RTV Dukagjini.
Ajo thotë se është shumë e vështirë të punohet me nxënësit në ditët e sotme.
Sipas saj materiali që duhet të punohet me ta duhet të jetë i nivelit shumë më të ulët.
Mësimdhënësja shkon edhe më tutje duke thënë se ka nxënës që edhe emrin e vet nuk dinë ta shkruajnë.
“Kam shumë nxënës, që kur mi dorëzojnë testet, emrin e vet e shkruajnë gabim, një shkronjë iu mungon”, ka deklaruar ndër të tjera mësimdhënësja Zoja Konjufca.
