Një gjykatë norvegjeze ka dënuar me 21 vjet burgim personin që kishte vrarë motrën e tij nga njerka dhe kishte hapur zjarr në një xhami, raporton BBC.
Philip Manshaus 22-vjeçar kishte hapur zjarr në Qendrën Islamike al-Noor në Baerum, në perëndim të kryeqendrës Oslo, në gusht të vitit të kaluar.
Kishte shtënë disa herë në xhami, por asnjër person nuk u lëndua rëndë. Sulmi i tij është trajtuar si akt i terrorizmit racor i krahut të djathtë.
Policia zbuloi dëshmi se Manshaus ishte inspiruar nga Brenton Tarrant, që është akuzuar për sulmet vrasëse në dy xhami në qytetin Christchurch të Zelandës së Re në mars të vitit 2019. Tarrant u deklarua fajtor për 51 akuzat për vrasje.
Manshaus duhet të shërbejë minimum 14 vjet burg, që është më tepër se dënimin minimal prej dhjetë vjetëve që ka marrë Anders Behrin Breivig, ekstremisti i krahut të djathtë që kishte vrarë 77 persona në Norvegji në vitin 2011. Norvegjia ka rritur dënimin minimal për raste të tilla në vitin 2015.
Manshaus ishte i armatosur rëndë kur u fut në xhami në gusht të vitit të kaluar, por ai ishte frenuar nga një ish-ushtarak i forcave ajrore të Pakistanit, 65-vjeçari Mohammad Rafiq. Ai e rrëzoi Manshausin dhe arriti ta mbante derisa erdhi policia.
Pak kohë pas sulmit, trupi i motrës së tij nga njerka, 17-vjeçares Johannes Zhangjia Ihle-Hansen u gjet në një shtëpi në Baerum.
Në verdiktin e lexuar nga gjyqtarja Annika Lindstroem është thënë se Manshaus kishte vizituar faqe neo-Nazistes përfshirë edhe ato faqe që bëjnë thirrje për luftë civile “bazuar në racë”.
Ajo ka thënë se qëllimi i tij kur ishte futur në xhami kishte qenë të vriste sa më tepër muslimanë që është e mundur.
Në gjykatë Manshaus kishte shprehur admirim për vrasësin e Christchurchit, Tarrantin, i cili kishte filmuar dhe transmetuar direkt sulmin në xhami.
Edhe vet Manshaus kishte mbajtur kamerë në helmetë dhe kishte filmuar të shtënat, por dështoi të transmetonte sulmin online.
Në gjykatë Manshaus po ashtu ka cituar Adolf Hitlerin dhe Breivikun si idhuj të tij, ka folur për të ashtuquajtur “gjenocid ndaj evropianëve”.
Gjykata ka refuzuar argumentet e mbrojtjes se Manshaus nuk është mentalisht mirë. Pos dënimit me burg, Manshaus është dashur të kompensojë edhe familjarët e viktimave e po ashtu të mbulojë shpenzimet gjyqësore.
