Gjendja në Kosovë për shkak të pandemisë COVID-19 vazhdon të jetë e rëndë. Si pasojë e virusit korona, deri tani janë prekur mbi 25 mijë qytetarë, ndërsa rreth 800 të tjerë kanë vdekur.
Madje, kryeministri i Republikës së Kosovës, Avdullah Hoti, mas marrjes së masave të reja anti-COVID, që pritet të hyjnë në fuqi nesër, ka thënë se që nga paslufta kjo është gjendja më e rënduar në vend.
Që nga rasti i parë, ata të cilët po mbajnë rend dhe rregull, janë njësitet e Policisë së Kosovës, madje me orar të zgjatur. Por edhe në këtë institucion ka zyrtarë që vazhdojnë të jenë në vetëizolim, kjo për shkak se janë infektuar me virusin korona.
Në një përgjigje për IndeksOnline, PK thotë se janë mbi 140 zyrtarë të infektuar.
“Për momentin janë të prekur me COVID 19 rreth 141 zyrtarë të PK-së (policë dhe staf civil), ku dy nga këta janë duke u shëruar në spital, 139 janë në trajtim në shtëpi.”, thonë nga Policia.
Janë pikërisht policët ata të cilët po zbatojnë edhe urdhërat e Qeverisë për qytetarët që thyejnë rregullat anti-COVID, veçmas për mbajtje të maskave. E numri i atyre që u dënuan s’është dhe i vogël.
“Numri i gjobave qe ka shqiptuar policia nga 26.08.2020 (që kur ka filluar së implementuar ligji antiCOVID), është 72263 gjoba”, kanë thënë për portalin tonë Policia e Kosovës.
Kujtojmë që Policia e Kosovës po punojnë me kapacitete të plota, ndërsa janë të vendosur në çdo cep të vendit.
