Shtimi i rasteve me koronavirus në Kosovë po vazhdon, ndërkohë që edhe OBSH ka dhënë një paralajmërim për rikthimin e virusit në Kosovë dhe Shqipëri, si vendet ndër më të prekurat me raste të reja.

Kryeministri i Kosovës, Avdullah Hoti, bëri një paralajmërim se mund të kthehen masat e izolimit total, të cilat mund të kenë ndikim të madh në ekonomi. Ai tha se nëse vazhdohet me shtim të rasteve, sistemi shëndetësor mund të kolapsojë dhe situata të dalë nga kontrolli.

Kosova ka gjithsej 2169 raste me Covid-19 të konfirmuara. Prej tyre 1047 persona janë shëruar ndërsa 40 kanë ndërruar jetë.

Në krahasim me vendet e rajonit, Kosova ka shtim të madh të rasteve të cilat erdhën pas lehtësimit të masave.

Shqipëria ka për momentin 2402 raste totale me Covid-19. 1384 persona janë shëruar dnërsa 55 kanë ndërruar jetë.
Shqipëria qëndron pak më mirë se Kosova me raste aktive. Për momentin janë 963 persona me virus në Republikën e Shqipërisë.

Shumë më keq qëndron Maqedonia e Veriut. Në 24 orët e fundit janë konfirmuar 148 rsate me Covid-19 në këtë shtet. 6080 raste janë të konfirmuara gjithsej, ndërsa 2315 persona janë shëruar. 286 të tjerë kanë humbur jetën pas prekjes nga virusi. 3479 raste janë ende aktive.

Serbia ka 14046 raste me Covid-19 të konfirmuara. 12464 janë shëruar nga virusi ndërsa 270 persona kanë humbur jetën. Javën e kaluar në këtë shtet u mbajtën zgjedhjet nacionale.

Mali i Zi ka gjendjen më të mirë me pandemi. Janë vetëm 439 raste me koronavirus në Mal të Zi. 315 persona janë shëruar ndërsa 9 persona kanë humbur jetën.