Në disa rajone të Kosovës gjatë ditëve të fundit janë përhapur zjarre për shkak të temperaturaturave të larta verore, përderisa ka dyshime se të njejtit po ndizen qëllimisht nga dora e njeriut.
Numri i vatrave aktive me zjarr në vend aktualisht janë 11.
Kështu ka bërë të ditur për Front Online zëdhënësi i Agjencisë së Menaxhimit të Emergjencave, Nehat Koqinaj.
“Vatrat e zjarrit janë të menaxhueshme nga kapaciteti lokal dhe qendror ”, tha ai.
Situata më e rënduar në këtë drejtim, sipas tij, vazhdon të jetë në Bjeshkët e Nemuna.
Madje në fshatin Bogë janë djegur edhe dy shtëpi vikendi, tha Koqinaj për Front Online.
“Në fshatin turistik Bogë jane djegë dy shtëpi vikendi ndërsa 3 janë shpëtuar. Në reagim përveq njësive profesionale të zjarrfikjes dhe shpëtimit, njësia e FSK-së është në reagim, ndërsa mbështetja nga kapaciteti i KFOR-it ofrohet bazuar në kërkesat, edhe sot ka reaguar në zonën e Bjeshkëve të Nemuna”, tha Koqinaj për Front Online.
Ndërsa Komuna tjera të prekura është edhe Komuna e Kamenicës, Malisheva, Klina, Gjakova dhe Drenasi, ku në secilën prej tyre është nga një ekip.
“Vatra zjarri janë shfaqë në orët e paradites edhe në Prizren, të cilat janë të menaxhueshme dhe pa rrezik për zhvillim më tutje- shtrirje. Në Komunë të Gjakovës në dy lokacione, tani më të shuara. Deçan gjithashtu, një lokacion i shuar, Malishevë në Ngucat dhe Javor”, u shpreh Koqinaj.
Koqinaj tha për Front Online se në rast se është e nevojshme do të kërkohet edhe ndihmë.
“Ndihma dhe mbështetja për nivelin Komunal ofrohet nga Agjencia e Menaxhimit Emergjent në kuadër të MPB-së. Ndihmë do të kërkohet në rast kur vendi vlerëson se i ka shterrë gjitha kapacitetet për reagim dhe menaxhim nga vendet ku Kosova ka marrëveshje bashkëpunimi për ndihmë reciproke, dhe Mekanizmi Evropian i Mbrojtjes Civile”, tha ai.
Ende nuk ka të dhëna të sakta për dëmet e shkaktuara nga zjarri, por vlerësohet se nga zjarret janë përfshirë mbi 70 hektarë sipërfaqe pyjore. /Front Online/