Kryetari i AAK-së Ramush Haradinaj ka mirëpritur ftesën e përfaqësuesve të anëtarëve të një spektri të gjerë të shqiptarëve në Amerikë për një takim interaktiv të përbashkët virtual me liderët e shtetit dhe partive parlamentare të Kosovës, në prag të takimit të 2 shtatorit në Shtëpinë e Bardhë.

Ai në një postim në Facebook ka shkruar se bashkatdhetarët shqiptaro-amerikanë kanë qenë dhe janë boshti i lidhjes së fortë të Kosovës me SHBA-në.

“Gëzimet e shqetësimet i kemi ndarë gjithmonë bashkë. Bashkërendimi dhe koordinimi strategjik, në këtë kohë udhëkryqi politik për Kosovën, si në kohërat më të vështira, është jetik. Vetëm të bashkuar dhe krah për krah me Amerikën, shqiptarët do të mund ta ruajnë dhe ta forcojnë Kosovën e 17 shkurtit”, ka shkruar Haradinaj.

Ndryshe, emisari special i presidentit të SHBA-së për bisedimet Kosovë-Serbi, Richard Grenell ka paralajmëruar se udhëheqësit e dy vendeve të Kosovës dhe Serbisë, do të takohen më 2 shtator në Uashington.

Kryeministri i Kosovës Avdullah Hoti, konfirmoi pjesëmarrjen në takim, duke thënë se me palën serbe do të takohen si dy shtete të pavarura.

Më 27 qershor ishte paralajmëruar takimi Kosovë-Serbi në Shtëpinë e Bardhë, por ai u anulua për shkak të propozim-aktakuzës nga Specialja ndaj presidentit Hashim Thaçi, duke bërë që ky i fundit të anulojë pjesëmarrjen.

Në këtë takim ishte parashikuar të bisedohej për çështje ekonomike, heqjen e barrierave tregtare, lëvizjen e lirë të njerëzve dhe mallrave, si dhe investimet në infrastrukturën rajonale.

Takimi i paralajmëruar për 2 shtator, i paraprin vazhdimit të dialogut të Brukselit, që është paralajmëruar të vazhdojë nga mesi i shtatorit.

Dialogu Kosovë-Serbi u ndërpre në nëntor 2018 kur Qeveria e Kosovës e drejtuar nga Ramush Haradinaj, vendosi taksën ndaj mallrave serbe. Që nga ajo kohë Beogradi pati kushtëzuar rikthimin në tavolinën e bisedimeve me heqjen e tarifës dhe së fundi edhe të reciprocitetit, masë kjo e Kosovës që tashmë është hequr dhe mundësoi rinisjen e dialogut.