Në Vlahen të Hasit të Shqipërisë, që gjatë kohës të luftës priti me qindra pjesëtarë të Ushtrisë Çlirimtare të Kosovës, sot u zbulua një pllakë përkujtimore në shtëpinë e Alush Gradicës. Shtëpia e këtij të fundit gjatë viteve 1997-1999, shërbeu si bazë e UÇK-së gjatë luftës.
Kryetari i degës së OVL-UÇK-së në Has, Xhevdet Thaçi tha se në këtë vend është zhvilluar luftë. Sipas tij, këtu nuk ka pasur pritë por luftë dhe kontribut të burrave dhe grave.
“Shtëpia e Alush Gradicës ka qenë një bazë e UÇK-së që e kanë themeluar celulat e para, njëri ndër ta njeriu kyç është Kadri Veseli me anëtarët tjerë që i kemi njohur më parë. UÇK nuk ka pasur bazë që të hajë e pi ujë, por shtëpia e Alush Gradicës ka qenë vet UÇK-ja. Nënë Kujtesa ka qenë vetë UÇK-ja. Nuk keni dhënë bukë e ujë, por keni qenë pjesë e luftës, pjesë e kontributit”, u shpreh ai.
Kryetari i OVL-UÇK-së, Hysni Gucati ka theksuar se dy pllakat e vendosura në Vlahen e Nikoliç gjatë së shtunës tregojnë kontributin e këtyre vendeve gjatë luftës.
Ai ka falënderuar këto familje për kontributin e tyre. Dëshmoret e vendit, sipas Gucatit, kanë derdhur gjak që të jenë një shtet, e jo dy shtete.
“Hasni nuk është i ndarë por duhet të jetë bashkuar, nuk ka dy Hasa, por është një. Nuk duhet të jenë dy vende, por një. Mendoj dhe shpresoj që liderët tonë në Kosovë por edhe në Shqipëri, shumë shpejt do të heqin këtë kufi dhe duhet ta bëjmë një shtet, jo dy shtete”, ka theksuar ai.
E kryetari i Partisë Demokratike të Kosovës, Kadri Veseli, ish-anëtar i Shtabit të Përgjithshëm të UÇK-së gjatë zbulimit të pllakës përkujtimore u shpreh se Hasi është porta e lirisë dhe se familja e Alush Gradicës ka qenë një ndër bazat e para të UÇK-së.
“Këtu kanë kaluar shumë burra të mëdhenj. Kemi gjeneralin Ilaz Kodra, i cili po ashtu nga ky konak ka kaluar dhe ka rënë në altarin e lirisë, pastaj në trojet e Drenicës, pikërisht në përballje me armikun. Njëri nga bashkëluftëtarët është edhe Cahani. Gjithë Hasi ka qenë burra, kanë qenë të besës, kanë qenë luftëtarë. Bashkërisht e kemi arritur edhe pjesën e lirisë. Falënderojë të gjithë të cilët sado pak na kanë ndihmuar edhe na kanë ndihmuar me sakrificën”, ka thënë ai.
Veseli tha se gjithë luftëtarët duhet të jenë krenar që ishin pjesë e Ushtrisë Çlirimtare të Kosovës. Sipas tij, pavarësisht që është tepruar me numrin e veteranëve, UÇK ka qenë e gjithë Kosova.
I biri i Alush Gradicës, Mirjani ka falënderuar të gjithë ata që kanë kujtuar ato vite, ku shtëpia e tyre shërbeu si bazë e Shtabit të Përgjithshëm të UÇK-së.
Për këtë OVL-UÇK ka dekoruar këtë familje për kontributin e tyre gjatë viteve 1997-1999.
