Zëvendëskryeministrja e tretë e Republikës së Kosovës, Albulena Balaj-Halimaj, ka shkarkuar nga detyra këshilltaren e saj, Hajrie Gashin, siç thotë ajo për arsye se prindi i Gashit dyshohet të jetë përfshirë në vjedhjen e mbi dy milionë eurove, shkruan Front Online.

Balaj-Halimaj shkarkimin e këshilltares e ka quajtur si të domosdoshëm.

“Edhe pse jam e vetëdijshme që askush nuk duhet të mbahet përgjegjës për veprimet e familjarëve të tij, në këtë rast të saj, për shkak që kemi të bëjmë me një krim shumë të rëndë, lirimin e saj nga detyra e shoh si të domosdoshëm”, ka shkruar Balaj-Halimaj në Facebook.

Zëvendëskryeministrja thotë se vendimin e ka marrë për të hequr çdo dyshim se funksioni i këshilltares do mund të ndikonte në pengimin e drejtësisë.

Postimi i plotë:

Pas raportimeve në media se prindi i këshilltares sime Hajrie Gashi është i përfshirë në vjedhjen e mbi 2 milion eurove, kam marrë vendim që znj Hajrie Gashi ,me efekt të menjëhershëm, t’a liroj nga detyra e këshilltares.

Znj Hajrie që nga fillimi ka qenë ndër këshilltaret e përkushtuara jashtë mase dhe me sukses ka kryer të gjitha detyrat e ngarkuara nga unë!

Edhe pse jam e vetëdijshme që askush nuk duhet të mbahet përgjegjës për veprimet e familjarëve të tij, në këtë rast të saj, për shkak që kemi të bëjmë me një krim shumë të rëndë, lirimin e saj nga detyra e shoh si të domosdoshëm.

Këtë vendim e kam marrë për të hequr çdo dyshim para qytetarëve se funksioni i lartë i këshilltares do të mund të përdorej për pengim të drejtësisë!