Asociacioni i komunave me shumicë serbe duket se do të rikthehet në fokus të dialogut Kosovë-Serbi në takimin e kësaj të enjte në Bruksel, edhe pse autoritetet kosovare insistojnë se kjo temë “do të jetë vetëm pjesë e marrëveshjes gjithëpërfshirëse për normalizimin e raporteve ndërmjet të dyjave vendeve”.
Gjatë ditës është raportuar se delegacioni nga Beogradi, i udhëhequr nga Marko Gjuriq, drejtor i të ashtuquajturës Zyre Serbe për Kosovën do të diskutojë formimin e Asociacionit të Komunave Serbe dhe çështjen e pronës.
Një gjë e tillë në Kosovë është kundërshtuar si nga kryeministri Hoti, ashtu edhe nga opozita.
Agon Batusha, deputet i Lëvizjes Vetëvendosje në Kuvendin e Kosovës, ka thënë për Front Online, se kjo çështje duhet që të rregullohet në bazë të ligjeve të Kosovës, pa pasur përfshirje të Serbisë.
“Në marrëveshjen e mëparshme të Brukselit, Asociacioni i Komunave me shumicë serbe është dhënë vërtetimi se janë shkelur 20 e diçka nene të Kushtetutës së Kosovës dhe ka hedhur poshtë atë marrëveshje. Asociacioni i Komunave të Kosovës është çështje e brendshme e Kosovës dhe duhet që të rregullohet nga Kosova në bazë të ligjeve të Kosovës”, ka thënë ai.
Sipas tij, Kosova nuk ka nevojë që të diskutojë me Serbinë për krijimin e këtij Asociacioni.
“Nuk është e nevojshme që të diskutohet me Serbinë për qytetarët tanë. Serbët janë qytetarë tanë dhe territori është i Republikës së Kosovës dhe nenet mund ta zgjidhin vet këtë çështje pa pasur nevojë që të bisedohet me Serbinë”, ka thënë Batusha për Front Online.
Ai theksoi se nuk duhet lejuar asgjë që është në kundërshtim me kushtetutën e Kosovës, përfshirë këtu edhe krijimin e këtij Asociacioni me kompetenca ekzekutive.
“Çka do që është në kundërshtim me Kushtetutën nuk duhet që të lejohet”, ka thënë ndër të tjera deputeti i VV-së.
Në ndërkohë lidhur me hapjen e kësaj teme në takimin e nesërm në Bruksel, ka reaguar edhe Presidenca e Kosovës, raporton tutje Front Online.
Nga ta u tha se është një gabim i madh dhe i rrezikshëm hapja e temave për të drejtat e komuniteteve dhe për Asociacionin e komunave serbe në dialogun e Brukselit./Front Online
