Qeveria e Kosovës ka miratuar një sërë masash anti-Covid 19 sot, raporton Front Online.
Pas mbledhjes ku o morën këto vendime, kryeministri Albin Kurti u paraqit në një konferencë për medie.
Ai i arsyetoi masat duke thënë se janë marrë me qëllim që të ulen rastet e reja me COVID-19.
Sipas tij, qeveria, nuk ka qare pa vepruar.
“Janë rritur rastet shumë, sidomos, në dy javët e fundit. Andaj edhe i kemi marrë këto masa për të parandaluar këtë gjë. Ne nuk kemi qare pa vepruar sepse çdo i 5-ti qytetarë po del pozitiv me Covid-19”, theksoi ai para gazetarëve.
Ministri i Shëndetësisë, Arben Vitia, tha se situata me virusin nuk është aspak e mirë.
“Shkollat, institucionet publike e private, mosrespektimi i masave ne kafene, restorante, janë bërë shkak për këtë gjendje të rënduar, ku rastet janë rritur. Më të rrezikshme këtë situatë e bën edhe rritja e rasteve të reja me virusin britanik. Gjendja në spitalet tona është shumë e rëndë. Numri i të shtrirëve në spitalet tona do të kalojë numrin 1000, sipas analizave të IKSHPK-së. Nga dita e mërkurë 7 prill hyjnë në fuqi masat e reja e deri me 18 prill”, theksoi Vitia.
Ai e ka pranuar se rastet janë rritur edhe si rezultat i tubimeve elektorale në kohë pandemie.
“Po është e vërtetë. Çdo tubim i tillë ndikon në rritjen e infeksioneve”, deklaroi ai.
Tutje, Vitia, tregoi se kanë ndarë 50 milionë euro për blerjen e vaksinave.
“Presim një sasi të konsiderueshme nga Komisioni evropian. Kemi diskutime edhe me disa kompani tjera me të cilat po negociojmë për blerjen e vaksinave”, tha ai./Front Online/
