Presidentja e Sllovakisë, Zuzana Caputova do të izolohet në shtëpi deri të premten, si masë paraprake pasi njëri prej ndihmësve të saj pati kontakt me dikë që kishte dalë pozitivisht për Covid-19, tha zëdhënësi i saj.
Presidentja ka anuluar angazhimet e saj, përfshirë një takim të mërkurën me kreun e Senatit çek, Milos Vystrcil dhe presidentin austriak Alexander Van der Bellen.
Sllovakia është lavdëruar për përgjigjen e saj ndaj pandemisë.
Ishte një nga vendet e para në Evropë që mbylli kufijtë e saj dhe prezantoi vendosjen e detyrueshme të maskave edhe para se të raportoheshin rastet e para, raporton BBC.
Anëtarja e BE-së dhe NATO-s, e cila ka një popullsi prej 5.5 milionë, deri më tani ka regjistruar vetëm 1,589 raste pozitive.
Shumica tani janë rikuperuar. Gjithsej 28 njerëz kanë vdekur.
Sllovakia ka lehtësuar bllokimin e saj në javët e fundit, dhe aktualisht po lejon turistë nga 19 vende, kryesisht në Evropën qendrore dhe lindore, Skandinavinë dhe shtetet e Balltikut. Turistët nga pjesa tjetër e Evropës nuk lejohen të hyjnë.
