Viteve të fundit në Kosovë, përdorimi i substancave narkotike ka shënuar ngritje, ku në mesin e përdoruesve është një numër i madh i të rinjve, me ç’rast dhjetëra raste të tilla raportohen çdo javë nga Policia. Një rast i tillë është raportuar edhe sot në orët e para të mëngjesit, ku një 24-vjeçare është kapur me drogë në rrugën ‘Driton Islami’ në Ferizaj, raporton Gazeta Sinjali.

Burimet e Gazetës Sinjali bëjnë të ditur se rreth orës 03:50 të mëngjesit, njësitet policore kanë ndalur për kontroll veturën e të dyshuarës (emër i njohur për redaksinë), ku është gjetur një sasi e dyshuar e substancës narkotike e llojit LSD, një llullë për përdorimin e substancave narkotike, një grinder dhe një letër e cila përdoret për të mbështjellur cigaret e përziera me marihuanë.

Policia menjëherë ka arrestuar 24-vjeçaren e cila më pas është dërguar në stacion, ku është intervistuar dhe më pas me urdhër të prokurorit kujdestar, ndaj saj është iniciuar rast ‘Posedim i paautorizuar i narkotikëve, substancave psikotrope dhe analoge’.

Kujtojmë se sipas Kodit Penal të Kosovës, është e jashtëligjshme që qytetarët të blejnë, posedojnë apo shpërndajnë substanca narkotike dhe mund të dënohen me gjobë apo burgim, varësisht nga sasia dhe lloji i lëndës narkotike që iu kapet nga autoritetet e rendit.