Punëtorë me maska në fytyrë po punojnë në segmentin e fundit të një ure të re në Gjenovë, përderisa kryeministri italian i nderoi 43 viktimat e shembjes së urës së vjetër në qytetin verior.

Ndonëse vendi po përballet me koronavirusin, që e ka shkaktuar ndërprerjen e pothuajse të gjitha projekteve ndërtimore në tërë vendin, ekipet që po punojnë në urën e re mbi lumin Polcevera nuk u zmbrapsën më herët nga vërshimet dhe as tash nga sëmundja për t’i përfunduar punimet me kohë.

Ura që e lidhte Italinë me Francën u shemb më 14 gusht të vitit 2018, duke lënë 43 të vdekur e dhjetëra të tjerë të lënduar.

“Kjo nuk mund të jetë ditë feste, sepse rrjedh nga një tragjedi, por modeli i Gjenovës hedh dritë mbi tërë Italinë”, tha kryeminsitri Giuseppe Conte gjatë një ceremonie modeste që u mbajt nën urën e re.

Punimet për ndërtimin e urës së re filluan në janar të vitit 2019 dhe aty është punuar ditë e natë që projekti të përfundohet sa më shpejt.

Kompanitë që janë duke i kryer punimet shpresojnë se ura do të lëshohet për qarkullimin e automjeteve pas tre muajve, shkruan “Reuters”, transmeton Gazeta Express.

Për fat të keq, një punëtor është diagnostikuar me koronavirus, por më vonë është shëruar. Megjithatë, 23 bashkëpunëtorë të tij janë detyruar të vendosen në karantinë.