Në 416 ka shkuar numri i të vdekurve, me 6 rastet e fundit të fataliteteve, që u regjistruan në 24 orët e fundit. Ndërsa nga 494 të testuar, 141 persona kanë rezultuar pozitivë me COVID-19.

E derisa numri i të infektuarve dhe të vdekurve ka nisur të bjerë, Komiteti për Menaxhimin e Pandemisë një ditë më parë propozoi edhe tri rekomandime për gastronominë.

I pari ishte që në qendrat tregtare ushqimore dhe joushqimore të kenë punonjës, i cili nuk lejon hyrjen e konsumatorëve pa maska, ndërsa në qendrat tregtare ku shiten ushqimet konsumatorët të kenë nga një karrocë për blerje, në këtë mënyrë duke krijuar distancën.

Sipas ministrit të Shëndetësisë, Armend Zemaj, rekomandimi tjetër kishte të bënte me obligimin që lokalet një numër të tavolinave t’i kufizojnë për moslejim të shërbimit.

Mirëpo Selatin Kaçaniku nga Organizata për Mbrojtjen e Konsumatorit e quan qesharak rekomandimin për bartjen e karrocave brenda qendrave tregtare derisa ato nuk dezinfektohen.

Megjithatë, për moszbatimin e masave në fuqi, vetëm brenda tri ditëve Inspektorati Sanitar nga mbi 700 inspektime, gjobiti 62 subjekte.

Ndërsa 44 qytetarë u dënuan për mosbartje të maskave në vende publike.

Derisa në anën tjetër gastronomia dhe hoteleria kanë kërkuar zgjatje të orarit të punës, ulje të TVSH-së, si dhe ndarje të mjeteve shtesë për këtë sektor.

Në Kosovë deri më tani janë mbi 11 mijë persona të infektuar, mbi 7 mijë të shëruar, ndërsa rreth 4 mijë raste mbesin aktive. /koha/