Gjykata Speciale e Kosovës ka refuzuar kërkesën e mbrojtjes së Isni Kilajt për të ndryshuar kushtet e lirimit të tij, të cilat janë vendosur në muajin maj të këtij viti.

Konkretisht gjyqtarja Marjorie Masselot ka refuzuar kërkesën e mbrojtjes që Kilajt t’i lejohet udhëtimi në Shqipëri, pasi që sipas saj, ndryshimet e propozuara nuk trajtojnë mjaftueshëm rreziqet e përshkruara në nenin 41 (6) (b) të Ligjit për Gjykatën Speciale.

“Në një version publik të vendimit të saj, të depozituar më 24 shtator 2024, gjyqtarja e vetme në rastin e Isni Kilajt refuzoi kërkesën e Mbrojtjes për ndryshimin e kushteve për lirimin e Isni Kilajt, të cilat ishin vendosur në maj të këtij viti. Mbrojtja kërkoi ndryshime të përkohshme të kushteve aktuale për ta lejuar atë të udhëtonte në Shqipëri, por gjyqtarja Marjorie Masselot vendosi se ndryshimet e propozuara nuk do të trajtonin mjaftueshëm rreziqet ekzistuese të përshkruara në nenin 41(6)(b) të ligjit” njofton Specialja.

Specialja katër muaj më parë ka liruar Kilajn nga paraburgimi për t’u mbrojtur në liri, me disa kushte ku përfshihej një dorëzani prej 30 mijë eurosh, të mos largohet nga territori i Kosovës, të tregojë për adresën e banimit dhe të japë deklarata publike në media./Express/