Po iu drejtohen spitalit për të marrë shërbime mjekësore. Të njejtit nuk janë të prekur me Covid-19, mirëpo kanë telashe tjera shëndetësore.
Mirëpo, ata po ankohen se shërbimet mjekësore nuk po arrijnë t’i marrin në kohë.
Pikërisht për këtë problematikë, Shoqata e të Drejtave të Pacientëve ka pranuar rreth 80 ankesa, që sipas tyre, janë adresuar në institucionet përkatëse, raporton T7.
Rifat Ramadani, qytetar: “Qe tri ditë vrapoj nëpër spitale, një punë nuk mundem ta kryej, prit ai është në mbledhje ky është në mbledhje, nuk mundem të kryej punë, tmerr është ishalla të ardhmes i vjen diçka”.
Të njëjtin problem e ka edhe qytetari Ukshin Mjekiqi, i cili thotë se Ministria e Shëndetësisë nuk po tregon interes sa duhet për pacientët jo COVID.
Mjekiqi: “Nuk po na marrin parasysh, nuk po interesohen sa duhet e sidomos për pleq… Fajtor janë Ministria (e Shëndetësisë) e mjekët sepse nuk ka interes”.
E, se pacientët që s’janë të prekur me COVID nuk po i marrin shërbimet e nevojshme e thotë edhe kryetari i Shoqatës së të Drejtave të Pacientëve në Kosovë, Besim Kodra.
Kodra: “Me fillimin e rasteve të para në Kosovë, i gjithë fokusi i qeverisë është orientuar në rastet e COVID-19, ndërsa rastet të cilat nuk kanë pasur COVID-19 kanë mbetur pa u trajtuar, për shkak se kishte një vendim qeveritar që operacionet apo rastet që nuk janë emergjente të mos trajtohen. Tek ne kanë ardhur një numër i madh i ankesave”.
Derisa flet për ankesat e pacienteve, Kodra thotë se qeveria duhet të ndryshojë këtë qasje, ai thotë se kanë propozuar që të krijohet një linjë e veçantë e shërbimit për COVID-19, ndërsa sistemi shëndetësor të vazhdojë rrugën normale siç e ka pasur para pandemisë.
