Organizatat e shoqërisë civile kanë themeluar një platformë të përbashkët për procesin e dialogut Kosovë-Serbi.

Përmes një deklarate të përbashkët, shoqëria civile thotë se përkundër rifillimit të dialogut ky proces është duke u karakterizuar me mungesë të transparencës.“Përkundër rifillimit të këtij procesi nën një mandat të ri të Përfaqësuesit të Lartë të BE-së, dhe me përfshirjen direkte të SHBA-ve, mungesa e transparencës, llogaridhënies dhe konsensusit politik vazhdon të karakterizojë të njëjtin”, thuhet në deklaratë.

Anëtarët e kësaj Platforme synojnë të kontribuojnë në proces mbi bazën e ekspertizës së tyre por duke mos u bërë pjesë e ekipeve politike në kuadër të dialogut.

“Duke synuar paanshmëri në proces, anëtarët e kësaj Platforme kanë për qëllim të kontribuojnë në proces, me anë të veprimeve të përbashkëta, mbi bazën e ekspertizës së tyre, por duke mos u bërë pjesë e ekipeve politike në kuadër të dialogut. Anëtarët nënshkrues synojnë të promovojnë një dialog publik të strukturuar dhe konstruktiv lidhur me procesin e dialogut dhe temat që ndërlidhen me të. Përbrenda funksionimit të Platformës, ato synojnë afrimin dhe njoftimin e qytetarit me procesin e dialogut, duke avokuar për pjesëmarrje më të madhe të qytetarëve e palëve të tjera të interesit në këtë proces me akterë të brendshëm dhe ndërkombëtar”, thuhet në deklaratën e përbashkët të shoqërisë civile.