Nxënësit e shkollës profesionale “28 Nëntori” në Prishtinë, njësinë “Rrjetet gjeodezike” po e mësojnë nëpërmjet shënimeve. Në mungesë të teksteve për lëndën e gjeodezisë, profesori Enis Hoda ka marrë disa libra të fakulteteve dhe skripte të përpiluara nga mësimdhënësit për t’u shpjeguar nxënësve.

Ai tregon se përveç mungesës së teksteve, shkollat profesionale po ballafaqohen edhe me mungesë të kabineteve e pajisjeve për punë praktike.

“Huazimi ose marrja e temave nga librat universitarë për moshën e nxënësve është mjaft shqetësuese pasi që aty shtjellohen disa tema mjaft të gjera. Tani për tani posedojmë vetëm një instrument gjeodezik, i cili ka ardhur donacion vitin e kaluar nga Komisioni evropian dhe nuk i përmbush të gjitha nevojat e një profesori për zhvillimin e praktikës profesionale”, thotë ai.

Të njëjtin problem e kanë edhe në shkollën e mesme elektroteknike “Gjin Gazulli”. Mësimdhënësit iu referohen teksteve të fakulteteve dhe përkthejnë materiale nga autorë të huaj. Mësimdhënësja Zade Lahi thotë se në shkollat profesionale është vështirë të punohet jo vetëm pa tekste mësimore, por edhe pa pajisje elektrike dhe kabinete.

“Ka disa kabinete, mirëpo nuk ka për të gjithë arsimtarët e për të gjitha drejtimet. Kryesisht kabinetet e informatikës janë më të pajisura. Shpresoj që ky problem të zgjidhet sa më parë dhe të mendojë dikush për të ardhmen e kësaj rinie”, thotë ajo. E nxënësja Olisa Makolli ankohet se kjo formë e mësimit është e vështirë dhe nuk sjell rezultate. “Kemi edhe mungesë të librave, por edhe të kabineteve. Sidomos tash në pandemi që veç 25 minuta zgjat ora, shumë pak po na bie të shkruajmë dhe të mësojmë. Është shumë vështirë se për ato 25 minua profesorët po duhet të shpjegojnë më shpejt dhe s’po munden me mbërri deri në fund me na dhënë shënime”, thotë ajo./KOHA