Numri i rasteve ditore të koronavirusit në Shtetet e Bashkuara e ka arritur nivelin më të lartë në dy muajt e fundit me mbi 58.000 të infektuar për 24 orë.
Dhjetë nga pesëdhjetë shtetet e ShBA-së raportuan numër rekord të rasteve ditore të premten, përfshirë Indianën, Minesotën, Misourin dhe Ohion. Wisconsini dhe Illinoisi shënuan mbi 3.000 raste të reja për të dytën ditë radhazi. Kjo nuk kishte ndodhur as në kulmin e pandemisë në pranverë.
Montana, New Mexico, Oklahoma, Virgjinia Perëndimore dhe Wyoming gjithashtu raportuan shifra rekorde të rasteve në 20 orët e fundit, shkruan Reuters.
Deri më tani, nëntëmbëdhjetë shtetet të ShBA-së kanë shënuar rekorde të rasteve ditore të koronavirusit gjatë muajit tetor.
Pavarësisht gjendjes shqetësuese dhe shtimit të rasteve, presidenti Donald Trump është i vendosur që ta vazhdojë fushatën zgjedhore të shtunën nga Shtëpia e Bardhë, ndërsa të hënën do të udhëtojë në Florida për të mbajtur një tubim.
Pas rritjes së rasteve, spitalet në disa shtete po kanë vështirësi për ta menaxhuar numrin e madh të pacientëve. Shtatë shtete të premten raportuan rekord të numrit të pacientëve me koronavirus: Arkansasi, Kansasi, Misouri, Montana, Dakota Veriore, Oklahoma dhe Wisconsini.
Shtetet e Bashkuara janë vendi më i prekur në botë nga pandemia Covid-19. Ato e kanë vendin e parë për numrin e të vdekurve me mbi 213.000 viktima deri më tani.
