Deputeti i Kuvendit të Kosovës nga radhët e Nisma Socialdemokrate, Haxhi Shala, ka kritikuar Qeverinë “Kurti” për qeverisjen e deritanishme, ngase siç tha ai, nuk ka bërë asgjë përveç shkarkimeve e emërimeve të anëtarëve në Bordet e Ndërmarrjeve Publike.

Ai në një intervistë për Front Online tha se qeveria “Kurti” nuk ka punuar asgjë, por i ka mashtruar qytetarët se po bënë ç’kapjen e shtetit, derisa në këto ndërmarrje janë punësuar njerëz të “Vetëvendosjes”.

Shala foli edhe për vendimin që pritet ta marr Gjykata Kushtetues për dekretin e Presidentit për formimin e Qeverisë në krye me Avdullah Hotin.

Ai tha se presin që vendimi i Kushtetueses të jetë pozitiv, pasi që siç tha ai, shumica e krijon Qeverinë.

“Po 80 për qind dihet, sepse ne të gjithë edhe përmes analistëve në televizione shifet se do të jetë një vendim pozitiv për krijimin e qeverisë, sepse çdo herë shumica e krijon Qeverinë dhe nuk mund të presim tjetër vendim se që do t’i jepet e drejta mandatarit të dytë që të formon Qeverinë, pasi që subjekti i parë nuk i ka pasur votat, ndërsa subjekti i dytë i ka numrat për ta formuar qeverinë, vendimi i Kushtetueses do t’i jep të drejtë dekretit të Presidentit për formimin e qeverisë”, tha Shala për Front Online.

Qeverinë e ardhshme të Kosovës e pret dialogu me Serbinë ku për rifillimin e këtij dialogu ka qenë kusht heqja e taksës. Me rifillimin e dialogut ndërmjet dy shteteve synohet arritja e një marrëveshje që çon në njohje reciproke të të dyja shteteve.

Se a do të ndodhë kjo marrëveshje gjatë Qeverisjes së LDK-së në koalicion me Nisman, Shala tha se arritja e marrëveshjes varet nga Serbia dhe ndërkombëtarët.

“Nuk mund të themi se do të arrihet, apo nuk do të arrihet sepse nuk varet nga Kosova kjo varet edhe nga pala tjetër njëkohësisht edhe nga faktori ndërkombëtarë, por a duhet të zhvillohet, po duhet të zhvillohet dialogu gjatë qeverisjes”, tha Shala për Front Online.

Shala i Nismës: Avdullah Hoti duhet t’i jap arsyet pse është rritur numri i Ministrive