Deputeti i Lëvizjes Vetëvendosje, Enver Dugolli, në një intervistë për Gazeta Blic, ka folur për provokimet e ushtrisë dhe xhandarmërisë serbe në kufi.

Ai ka thënë se qëllimet e Serbisë janë të qarta, por institucionet e Kosovës janë në krye të detyrës.

“Të gjitha këto raportime edhe ajo që e ka raportuar kryeministri edhe ajo në Merdarë këto provokime janë të vërteta, Serbia me këto provokime të tilla dëshiron ta tensionojë situatën. Qëllimet e Serbisë janë të qarta për ne, është mirë që institucionet tona janë në nivel të detyrës dhe nuk kalon asgjë pa u vërejtur prandaj qytetarët janë të sigurt sepse institucionet tona janë në krye të detyrës”, u shpreh ai.

Dugolli ka vlerësuar se rreziku është real pasi Serbia dëshiron ta minojë paqen dhe stabilitetin e vendit, por që Kosova mund të mbrohet.

“Ne në vazhdimësi kemi thënë se derisa qëndrimi i Serbisë ndaj Kosovës nuk ndryshon, rreziqet mund të jenë reale sepse ata dëshirojnë ta minojnë paqen dhe stabilitetin, janë të predispozuar që të veprojnë kundër sovranitetit dhe integritetit të Kosovës por ne jemi të vendosur që me çdo kusht ta mbrojnë sovranitetin dhe integritetin territorial”, ka theksuar deputeti për Gazeta Blic.

Duke marrë parasysh këto provokime, Dugolli flet për mundësinë e një sulmi si ai i Banjskës.

Ai thotë se rreziku ekziston derisa grupi që ka aktakuzë është i lirë dhe vazhdojnë të stërviten.

“Me vet faktin që grupi i identifikuar tashmë që ka aktakuzë zyrtare është i lirë në Serbi, përveç atyre që janë kapur dhe janë në procesin gjyqësor, ata po vazhdojnë të stërviten dhe të rigrupohen, rreziqet janë aty sepse lëre që nuk janë të kapur por nga Serbia s’ka gatishmëri që t’i dorëzojë ata e të përballen me drejtësinë në Kosovë”, ka deklaruar deputeti i VV-së, Enver Dugolli